8 ოქტომბრის შემდეგ ბიძინა ივანიშვილს აუცილებლად გავუშვებთ სახელმწიფოს ხარჯზე სასწავლებლად რომელიმე დამწყებ უმაღლეს სასწავლებელში სადმე, სადაც ასწავლიან განსხვავებას კამბოჯასა და ნიკარაგუას შორის, რომლებიც სხვადასხვა კონტინენტებზე დაშორებულები არიან ერთმანეთისგან, პოლ პოტსა და სტალინს შორის, - განაცხადა საქართველოს ყოფილმა პრეზიდენტმა, მიხეილ სააკაშვილმა Facebook live-ის დროს.

სააკაშვილის თქმით, ყოფილ პრემიერ მინისტრს, ბიძინა ივანიშვილს განათლება არ უყვარს. მისივე განცხადებით, ივანიშვილს წასვლის წინ აუცილებლად გაატანენ წიგნაკს, სადაც ჩაუწერენ, რა განსხვავებაა ჯავახიშვილსა და კაკაბაძეს, ყვარყვარე თუთაბერსა და სხვა ლიტერატურულ გმირებს შორის.

"ნაციონალური მოძრაობის" დროს რამდენიმე ათასი ადამიანი წავიდა საზღვარგარეთ სასწავლებლად, მათ შორის, ძალიან ბევრია ისეთი, ვინც დღევანდელ სახელმწიფო აპარატშია დღევანდელი მმართველობის პირობებში. ეს კარგია მაინც იმიტომ, რომ ხალხის განათლება ყველა შემთხვევაში კარგია. იქნება ეს დღევანდელი სახელმწიფო აპარატი, წინა სახელმწიფო აპარატი, ბიზნესსექტორი, "ნაციონალური მოძრაობის" წევრები თუ "ქართული ოცნების" წევრები.

აუცილებლად ამ კაცს სჭირდება განათლება. ეტყობა თავის დროზე დრო არ ჰქონდა, მაგრამ ჩვენ რა დავაშავეთ? - ჩვენზე იზღვია ათმაგად. უფრო მეტიც, ამ კაცს საერთოდ არ უყვარს განათლებული ადამიანები და ეს არის მისი მთავარი პრობლემა. აი, ხომ შეიყვანეს „ქართული ოცნების" სიაში ვითომ უცხოეთში განათლებამიღებული ადამიანები. ამჩნევთ, რომ კობახიძის გარდა არავინ გამოჰყავთ? მის ბუნებაში არ ზის განათლებული ადამიანების მოწონება“, - განაცხადა მიხეილ სააკაშვილმა.