"რესპუბლიკური პარტიის" ლიდერის, დავით უსუფაშვილის შეფასებით, ერთპარტიულობა საქართველოში არის ძალიან დიდი შეცდომა. მისი თქმით, ეს არის შეცდომა, რომელიც ბევრმა ლიდერმა დაუშვა ქვეყანაში და ამ შეცდომას უშვებს დღეს "ქართული ოცნებაც".

"არჩევნების და წინასაარჩევნო კამპანიის დანიშნულებაა, რომ მოსახლეობას დავანახოთ, თუ ვის ინტერესებს გამოვხატავთ.... საქართველო არის მრავალფეროვანი, ამიტომ არის მრავალპარტიულობა აუცილებელი. ამიტომ არის ერთპარტიულობა ძალიან დიდი შეცდომა, რომელიც ბევრმა ლიდერმა დაუშვა ამ ქვეყანაში და სამწუხაროდ, დღეს უშვებს "ქართული ოცნებაც". რადგან ერთი პარტია აგერ ვართ, ჩვენ ვმართავთ ქვეყანას და დანარჩენებმა მოგვიცადეთო, ეს არის სვლა უკან ძალიან დიდი უბედურებისკენ.

ჩვენ არჩევნებზე მოსახლეობას უნდა შევთავაზოთ ჩვენი პროგრამები და მერე პარლამენტში მოვახერხოთ და შევძლოთ ურთიერთობა და თანამშრომლობა. ამიტომ არის "ნაციონალური მოძრაობის" პოლიტიკა არასწორი და რჩება დღესაც, რომ მათაც მხოლოდ თავიანთთვის წარმოუდგენიათ ეს ქვეყანა. რატომ არ მოვიდნენ დღეს ეთერში? იმიტომ რომ დებატების და კამათის მათ ეშინიათ. იმიტომ რომ მათი "ექსკლუზიურობის" და "განუმეორებლობის" მითი დაინგრევა. და მეორე, თვლიან, რომ ისინი „დიდი ბიჭები“ არიან და ჩვენ „პატარა ბიჭები და გოგოები“ ვართ...

ჩვენ ვემსახურებით ჩვენს ქვეყანასა და ჩვენს ხალხს და ჩვენ პოლიტიკოსებმა ჩვენი ვალი უნდა მოვიხადოთ, მათ შორის დებატების დროს, მათ შორის ერთმანეთის მოსმენის კულტურის დროს. არჩევნების წინ უნდა ვიკამათოთ, არჩევნების შემდეგ, შედეგებიდან გამომდინარე, უნდა გავაგრძელოთ შრომა ჩვენი ქვეყნის აღმშენებლობისთვის, წინ წაყვანისთვის", - განაცხადა დავით უსუფაშვილმა "საზოგადოებრივი მაუწყებლის" ეთერში.