„ქართული ოცნება - დემოკრატიული საქართველოს“ გენერალური მდივანი კახა კალაძე შინაგან საქმეთა სამინისტროს მოუწოდებს, „ნაციონალური მოძრაობის“ ხვალინდელი აქციის მონაწილეების უსაფრთხოება ყველანაირად უზრუნველყოს, რათა მშვიდობიანად ჩაიაროს აქციამ.

მან ასევე ყველა საერთაშორისო სადამკვირვებლო ორგანიზაციას მიმართა და მოუწოდა, მეტი ყურადღება გამოიჩინონ და დააკვირდნენ ამ აქციას.

„მინდა მოვუწოდო ყველა საერთაშორისო სადამკვირვებლო ორგანიზაციას, რომ მაქსიმალურად მეტი ყურადღება გამოიჩინონ და დააკვირდნენ ამ აქციას. ასევე მოვუწოდებ შინაგან საქმეთა სამინისტროს, რომ ყველანაირად უზრუნველყოს აქციის მონაწილეების უსაფრთხოება, რომ მშვიდობიანად ჩაიაროს „ნაციონალური მოძრაობის“ მიერ დაანონსებულმა აქციამ”, - განაცხადა კალაძემ.

პარტიის გენერალურმა მდივანმა ასევე აღნიშნა, გადატრიალებას ან სისხლისღვრას დააპირებს, კანონის სრული სიმკაცრით დაისჯება.

”მოვისმინეთ პოლიტიკურად გაკოტრებული ძალის ლიდერების განცხადებები რევოლუციებთან დაკავშირებით. მინდა დავარწმუნო ჩვენი ქვეყნის მოსახლეობა, რომ არაფერი გამოუვათ. შესაბამისად, ჩვენ ვიმოქმედებთ კანონის ფარგლებში და ვინც რაიმე გადატრიალებას ან სისხლისღვრას დააპირებს, კანონის სრული სიმკაცრით დაისჯება. ამ ადამიანების საუბრის მანერიდან გამომდინარე, აშკარად ჩანს, „რუსთავი 2“-ის ჩართულობა, საუბარი იყო ეგზიტპოლებზეც. განცხადებები გაკეთდა, რომ ”რუსთავი 2” აპირებს ეგზიტპოლების გამოქვეყნებას. კვლევები, რომლებიც გამოქვეყნებულია, როგორც ჩანს, ისიც გაყალბებულია. ჩვენც ვატარებთ კვლევებს და აბსოლუტურად განსხვავებული შედეგებია. გუშინაც გაჟღერდა კონკრეტული პირების მიერ, რომლებმაც წარმოადგინეს რეალური შედეგები. ეს ყველაფერი არის ერთი სცენარის მიხედვით განხორციელებული. ერთი სცენარია, რომ უნდა გამოქვეყნებულიყო გაყალბებული კვლევები, შემდეგ არჩევნების დღეს ეგზიტპოლი და თითქოს ხმების დაცვის მიზნით უნდა მოხდეს ხალხის გამოყვანა ქუჩაში. ეს არის გაკოტრებული პოლიტიკური გუნდის ბნელი ზრახვები”, - განაცხადა კალაძემ.

პარტია „ერთიანი ნაციონალური მოძრაობა“ წინასაარჩევნო კამპანიის დასკვნით აქციას მიმდინარე წლის 5 ოქტომბერს, 16:00 საათზე გამართავს. „ნაციონალური მოძრაობის“ ერთ-ერთი წევრის, ნიკა მელიას თქმით, ეს აქცია იქნება მრავალათასიანი.    

„აქცია  მოიცავს, როგორც „ვარდების რევოლუციის“ მოედანს, ასევე რუსთაველსა და „თავისუფლების მოედანს“. ეს იქნება დასკვნითი კამპანიის შეხვედრა, სადაც უპრეცედენტოდ ხალხმრავალი აქცია გაიმართება, რომელსაც ბოლო წლების განმავლობაში ადგილი არ ჰქონია“, - განაცხადა ნიკა მელიამ და დასძინა, რომ „ნაციონალური მოძრაობა“ მხარდამჭერებს საქართველოს ყველა რეგიონიდან ეპატიჟება.