ბათუმში, ხიმშიშვილისა და ორბელიანის ქუჩების გადაკვეთაზე სპორტის სასახლის მშენებლობა იწყება. სპორტისა და ახალგაზრდობის საქმეთა მინისტრმა, ტარიელ ხეჩიკაშილმა აჭარის მთავრობის თავმჯდომარესთან, ზურაბ პატარაძესთან და მშენებელი კომპანიის ხელმძღვანელთან, შონ ლეპენთან ერთად, სასახლის საძირკველში კაფსულა ჩაუშვა.

სპორტისა და ახალგაზრდობის საქმეთა სამინისტროს ცნობით, დღესვე, მშენებლობის ადგილზე მშენებელ კომპანიასა და სამინისტროს შორის ხელშეკრულება გაფორმდა.

ხლეშეკრულებას ხელი სპორტისა და ახალგაზრდობის საქმეთა მინისტრმა, ტარიელ ხეჩიკაშვილმა, “სპორტმშენსერვისის” დირექტორმა, ლევან ტარყაშვილმა და კომპანია “ბეჰლემ ინდუსტრის” გენერალურმა დირექტორმა, შონ ლეპენმა მოაწერეს.

ბათუმში ორდარბაზიანი მულტიფუნქციური სპორტული კომპლექსის მშენებლობა იწყება, რომელიც სპორტის სხვადასხვა სახეობისთვის იქნება განკუთვნილი და ხელს შეუწყობს, როგორც პროფესიული სპორტის, ასევე მასობრვისი სპორტის განვითარებას რეგიონში. სასახლის დიდი დარბაზი 2 500, ხოლო პატარა დარბაზი 600 სტუმარზეა გათვლილი.

პროექტი „სპორტული ინფრასტრუქტურის განვითარების სახელმწიფო მიზნობრივი პროგრამის" ფარგლებში ხორციელდება და 2016-2017 წლებში საქართველოში სამი მულტიფუნქციური სპორტის სასახლის მშენებლობას ითვალისწინებს.

პირველ ეტაპზე სპორტის სასახლეები აშენდება თელავში, ბათუმსა და გორში. პროექტის პირველი ეტაპის ღირებულებაა 33 850 000 აშშ დოლარი, ხოლო სრული პროგრამის ღირებულება მეორე ეტაპის ჩათვლით 54 350 000 დოლარს შეადგენს. სამშენებლო სამუშაოებს კანადური კომპანია „ბეჰლენ ინდუსტრი“ გაუძღვება.