მარტვილის მუნიციპალიტეტში ხურმის საშრობის მშენებლობა მიმდინარეობს. როგორც Guardian.ge-ს მუნიციპალიტეტის გამგეობიდან აცნობეს, სოფელ კიწიაში მდებარე სასოფლო-სამეურნეო კოოპერატივმა "ალერტი" 2016 წელს სოფლისა და სოფლის მეურნეობის განვითარების, ევროკავშირის სამეზობლო პროგრამის (ENPARD) ფარგლებში, პროგრამის განმახორციელებელი ორგანიზაციისაგან „CARE საერთაშორისო კავკასიაში“, გრანტის სახით 77950 ლარის ღირებულების ხილის საშრობი მოწყობილობის სრული პაკეტი მიიღო.

საკუთარი თანამონაწილეობის ფარგლებში, კოოპერატივი საშრობი მოწყობილობის განსათავსებლად საჭირო , სურსათის უვნებლობის სტანდარტების შესაბამის შენობას აშენებს.

პროექტის ჯამური ღირებულება 98467 ლარს შეადგენს; კოოპერატივი ხილის მრავალფუნქციური საშრობის სრული დატვირთვით ამუშავების შემდეგ, ხურმის ჩირის წარმოებას, დახარისხებას, დაფასოებასა და შეფუთვას ადგილზე მოახდენს. კოოპერატივის წევრები სეზონზე 100 ტონამდე ხურმის გამოშრობას და ჩირის სახით 30-35 ტონა მზა პროდუქციის მიღებას გეგმავენ. კოოპერატივი წარმოებული პროდუქციის რეალიზაციას, როგორც ადგილობრივ, ასევე საერთაშორისო ბაზრებზე მოახდენს.

მარტვილის მუნიციპალიტეტის გამგეობის ცნობით, სასოფლო-სამეურნეო კოოპერატივი „ალერტი“ 2016 შეიქმნა და მასში მარტვილის მუნიციპალიტეტის სოფელ კიწიის, ნოღის, ბანძის 24 მეპაიე, მათ შორის 9 ქალბატონია გაერთიანებული. კოოპერატივის ძირითად საქმიანობას ხურმისა და ხურმის ჩირის წარმოება/რეალიზაცია წარმოადგენს.

"მარტვილის მუნიციპალიტეტში ხურმა მნიშვნელოვან სასოფლო-სამეურნეო კულტურას წარმოადგენს. ხურმის ჩირის წარმოება ძირითადად საოჯახო მეურნეობებში, ტრადიციული მეთოდებით მიმდინარეობს. ახალი საწარმოს მშენებლობა ხელს შეუწყობს დარგის განვითარებას და ხარისხიანი და სურსათის უვნებლობის სტანდარტების შესაბამისი პროდუქციის წარმოებას", - აცხადებენ გამგეობაში.