„ივანიშვილის რეჟიმმა დაგვაბრუნა ქვეყანაში, სადაც ცხრილავენ და აფეთქებენ ადამიანებს“,- განაცხადა „ნაციონალური მოძრაობის“ ერთ-ერთმა ლიდერმა, დავით ბაქრაძემ „რუსთავი 2“-ის ეთერში, რითაც მისი თანაგუნდელის, გივი თარგამაძის მანქანის აფექტების ფაქტს გამოეხმაურა.

მისი თქმით, ის ხელისუფლება, რომლის დროსაც ადამიანებს ქუჩაში აფეთქებენ, უნდა დასრულდეს.

„ფაქტით, რომელიც ვიხილეთ, გამოიკვეთა კიდევ ერთი მნიშვნელოვანი არგუმენტი, თუ რატომ უნდა დასრულდეს ეს ხელისუფლება მშვიდობიანად 4 დღეში. ივანიშვილის რეჟიმმა დაგვაბრუნა ქვეყანაში, სადაც ცხრილავენ და აფეთქებენ ადამიანებს. ამ ხელისუფლების დამთავრება აღარ არის პოლიტიკური გემოვნების საკითხი, ეს არის ქვეყნისა და ჩვენი მოქალაქეების მომავალი უსაფრთხოების საკითხი. გულწრფელად ვუსურვებ დაზარალებულებს გამოჯანმრთელებას. უნდა გვესმოდეს, რომ ეს ადამიანები ხიფათში ჩააგდო დღევანდელი ხელისუფლების მიერ შექმნილმა გარემომ. მე არ ვამბობ კონკრეტულად ვინ დგას ამ აფეთქების უკან, მაგრამ ქვეყანაში არის შექმნილი კლიმატი, სადაც ადამიანებს აფეთქებენ მანქანებში, სადაც ერთ-ერთ ცნობილ პოლიტიკოსს ესროლეს სამი ტყვია საარჩევნო შეხვედრაზე. ამ აფეთქების შემდეგ, ისე, როგორც არასდროს, ვარ დარწმუნებული, რომ 4 დღეში ეს ხელისუფლება დასრულდება, რადგან ხელისუფლება, რომლის დროსაც ადამიანებს ქუჩაში აფეთქებენ, უნდა დასრულდეს“, - განაცხადა ბაქრაძემ.

გუშინ საღამოს, თბილისში, კოლმეურნეობის მოედანზე "ნაციონალური მოძრაობის" ერთ-ერთი ლიდერის, გივი თარგამაძის ავტომანქანა აფეთქდა.

შსს-მ გივი თარგამაძის მანქანის აფეთქების ფაქტზე გამოძიება განზრახ მკვლელობის მუხლით დაიწყო.