ზუგდიდის მუნიციპალიტეტში „ნაციონალური მოძრაობის“ მაჟორიტარი დეპუტატობის კანდიდატის, სანდრა რულოვსის განცხადებით, ხალხი კარგ განწყობაზეა, მაგრამ დაღლილია იმ დაპირისპირებით, რაც დღეს ქვეყანაშია.

ამის შესახებ მან გადაცემა „არჩევანში“ სამეგრელოდან ჩართვისას განაცხადა.

სანდრა რულოვსი „ნაციონალური მოძრაობის“ ერთ-ერთი წევრის, გივი თარგამაძის მანქანის აფეთქების ფაქტსაც გამოეხმაურა. მისი თქმით, „ნაციონალური მოძრაობა“ დაშავებულებს მალე გამოჯანმრთელებას უსურვებს.

მან ასევე აღნიშნა, რომ „ნაციონალური მოძრაობის“ მხარდამჭერებმა უნდა დაანახოს საქართველოს ყოფილ პრეზიდენტს, ოდესის ოლქის გუბერნატორს, მიხეილ სააკაშვილს, რომ ქართულ პოლიტიკაში ღირსეულად შეუძლია დაბრუნება.

„ჩვენი გამარჯვება სულ ახლოს არის. გვიხარია, რომ გივი თარგამაძე და მისი მეგობრები გადარჩნენ. დაშავებულებს მალე გამოჯანმრთელებას ვუსურვებთ. სამეგრელოში ძალიან კარგი განწყობა გვაქვს, ძალიან ახლოს არის გამარჯვება, რამდენიმე დღეში იქნება. ხალხი კარგ განწყობაზეა, მაგრამ დაღლილია იმ დაპირისპირებით და ბოღმით, რაც დღეს ქვეყანაში მეფობს. ამის მაგივრად, ჩვენ უნდა ვუპასუხოთ სიმშვიდით, აღმშენებლობით და სიყვარულით. ჩვენ გვჭირდება დამაჯერებელი გამარჯვება და ეს აუცილებლად იქნება. ვანახოთ ჩემს მეუღლეს, მიშას, რომ მის პარტიას ძალიან დიდი მხარდაჭერა აქვს და, რომ შეუძლია ღირსეულად დაბრუნდეს ქართულ პოლიტიკაში“,-განაცხადა სანდრა რულოვსმა.