„შე უღირსო ადამიანო, შე არაკაცო, ასეთი მდგომარეობა ბაღდათს არცერთი გამგებლის პერიოდში არ ახსოვს“ - ასე მიმართა აღშფოთებულმა ქალბატონმა ბაღდათის მუნიციპალიტეტის გამგებელს, ირაკლი გეგეშიძეს არასამთავრობო ორგანიზაციის „მედიატორის“ მიერ მოწყობილ აქციაზე.

არასამთავრობო ორგანიზაცია ,,მედიატორის" წევრები ამბობენ, რომ გეგეშიძე არაერთხელ ამხილეს ისეთ ფაქტებში, როგორიცაა ნეპოტიზმი და თანამშრომლების უკანონოდ გათავისუფლება. აღნიშნული ორგანიზაციის წევრებსა და გამგებელს შორის მწვავე საუბარი შედგა, რომლის ამსახველი ვიდეო მასალაც "მედიატორმა" გაავრცელა.

ადგილობრივი მოსახლეობის ნაწილი ამბობს, რომ თუ გამგებელი არ დატოვებს თანამდებობას, აქციები პერმამენტულ ხასიათს მიიღებს და საჭიროების შემთხვევაში ისინი უკიდურეს ზომასაც მიმართავენ, რაც ირაკლი გეგეშიძისთვის სამუშაო კაბინეტის კარების აჭედვაში გამოიხატება.

,,ვინაიდან მან უკანონოდ გაათავისუფლა ერთ-ერთი თანამშრომელი დავით შოთაძე, რომელიც თავდაპირველად სხვა პოზიციაზე გადაიყვანა, შემდეგ ეს შტატი საერთოდ გააუქმა და სამსახურიდან გაათავისუფლა. მომხდარს წინ უძღოდა ის ფაქტი, რომ დავით შოთაძეს დაეწვა სახლი და გამგებელმა მას ადგილობრივი თვითმმართველობის გამოცდაზე გასვლა ,,არ ურჩია” მისი ფსიქოლოგიური მდგომარეობის გამო და დაჰპირდა, რომ სამსახურში დატოვებდა. მას შემდეგ, რაც შოთაძეს ხელშეკრულების ვადა ამოეწურა, გამგებელმა სამსახურიდან გაათავისუფლა. ეს არის ადამიანის შეცდომაში შეყვანა. ამჟამად დავით შოთაძე მძიმე სოციალურ პირობებშია. მოვითხოვთ გადადგეს ბაღდათის რაიონის გამგებელი ირაკლი გეგეშიძე! აქვე დავამატებ, გამგებელმა ჩვენთან საუბრისას აღიარა, რომ შოთაძის გათავისუფლების საფუძველი მხოლოდ მისი პირადი გადაწყვეტილებაა", აცხადებს ,,მედიატორის” წარმომადგენელი თორნიკე ბიკაშვილი.

ბაღდათის მუნიციპალიტეტის გამგებელი კი აცხადებს, რომ თანამშრომელთა სამსახურებიდან გათავისუფლება და რეორგანიზაცია კანონიერად მოხდა.