„ძვირფასო მეგობრებო, დღეს ამ დარბაზში ზის უკვე გამარჯვებული საქართველო,“ - ასე მიმართა "ლეიბორისტული პარტიის" ლიდერმა, შალვა ნათელაშვილმა მხარდამჭერებს ფილარმონიაში, სადაც პარტიამ წინასაარჩევნო დასკვნითი შეხვედრა გამართა.

ნათელაშვილმა დარბაზში შეკრებილ საზოგადოებას განუცხადა, რომ პარტია მზად არის ქვეყნის მმართველობაზე პასუხისმგებლობა აიღოს.

"ორ დღეში ქვეყანას სამუდამოდ დაემშვიდობება ივანიშვილის პოლიტიკური რეჟიმი და ეს იქნება ახალი გზა ჩვენი ხალხისა და ჩვენი სახელმწიფოსათვის. ჩვენი ხალხი მზად არის, ენდოს "ლეიბორისტულ პარტიას".

ჩვენ მზად ვართ, ავიღოთ პასუხისმგებლობა ქვეყნის მართვაზე, თითოეულ ოჯახეზე, თითოეულ პიროვნებაზე, მათ ბედნიერებაზე, მათ უსაფრთხოებაზე, მათ გამრავლებაზე და მათ სიხარულზე.

ჩვენ არ მივეცემით თვითტკბობას და მადლობების გადახდას სიტყვიერად, ჩვენ ჩვენს მადლობას დავამტკიცებთ საქმით, კონკრეტული საქმით", - განაცხადა პარტიის ლიდერმა.

შალვა ნათელაშვილი საქართველოს ყოფილი პრემიერ მინისტრის, ბიძინა ივანიშვილის მისი მისამართით გაკეთებულ განცხადებასაც გამოეხმაურა.

ივანიშვილის განცხადებას, რომ თუ "ლეიბორისტული პარტია" მოახერხებს არჩევნებში ბარიერის გადალახვას, ეს იქნება საქართველოს ისტორიის შავი ლაქა, ნათელაშვილი ასე პასუხობს:

"რამდენიმე დღის წინ, ბატონმა ივანიშვილმა სამარცხვინო უწოდა იმ ხალხს ვინც მხარს უჭერს "ლეიბორისტულ პარტიას" და ჩვენი პარტიის არჩევას უწოდა სამარცხვინო ლაქა. მე არ მინდა მას დავემსგავსო შეფასებებში, მაგრამ მე შემიძლია განვაცხადო ერთი რამ, რომ მისი მმართველობა უკვე შესულია ისტორიაში შავ და სამარცხვინო ლაქად....

პირსუკან საუბარს, მაპატიეთ, ლანძღვა-გინებას, ტელეკამერების უკან დამალვას, კულისებში ფარულად მოქმედებას, ბინძური, ცილისმწამებლური გაზეთების ბეჭდვას, სადაც ჩამოთვლილია ყველა ცოდვა მაჰათმა განდის მკვლელობიდან დაწყებული არგენტინის სახელმწიფო გადატრიალებით დამთავრებული - აი, ამაში მილიონების ხარჯვას სჯობია, ის დღეს საღამოს 20:00 საათზე მოვიდეს "რუსთავი 2"-ის პირდაპირ დებატებში და პირდაპირ დამელაპარაკოს თავის პრეტენზიებზე და მე ვეტყვი ჩვენს პრეტენზიებზე".