პარლამენტის თავმჯდომარის, დავით უსუფაშვილის განცხადებით, „რუსთავი2“-ის ეთერში, 6 პოლიტიკურ პარტიას შორის დაგეგმილი პოლიტიკური დებატები აღარ შედგება იმის გამო, რომ პარტია „ქართული ოცნება“ დებატებში მონაწილეობაზე უარს ამბობს.

როგორც მან ჟურნალისტებთან საუბრისას აღნიშნა, პოლიტიკური პარტია და პოლიტიკური ლიდერი, რომელიც დებატებს გაურბის, უარს ამბობს პოლიტიკურ ლიდერობასა და ქვეყნის მართვაზე.

პარლამენტის თავმჯდომარის თქმით, არჩევნების წინ დებატებში მონაწილეობა არის არა პოლიტიკოსების უფლება, არამედ მათი ვალდებულება.

„ჩემთვის ეს არის სრულიად აღმაშფოთებელი და წარმოუდგენელი ერთის მხრივ, „ქართული ოცნებისა“ და მისი ლიდერების მხრიდან, რომლებიც თავს არიდებენ დებატებს ყველგან. მინდა შეგახსენოთ, რომ არც „ქართული ოცნება“, არც „ნაციონალური მოძრაობა“ და არც ორი-სამი სხვა პარტია არ მობრძანდნენ საზოგადოებრივ არხზე დაგეგმილ დებატებში. ისიც არ იკადრეს, აეხსნათ საზოგადოებისთვის - რატომ. პოლიტიკური პარტია, პოლიტიკური ლიდერი, რომელიც დებატებს გაურბის, ის უარს ამბობს პოლიტიკურ ლიდერობასა და ქვეყნის მართვაზე. დებატები არ არის უფლება. არჩევნების წინ დებატებში მონაწილეობა არის პოლიტიკოსების ვალდებულება. მე ასევე აღშფოთებული ვარ და მინდა, „რუსთავი2“-მა თავისი ეთერით საზოგადოებას ამცნოს, რომ ამ შემთხვევაში „რუსთავი 2“ „ქართული ოცნების“ ჭკუაზე დადის. თუ ისინი არ მოვლენ, დანარჩენი პარტიების დებატები საზოგადოებას არ აინტერესებს?! არ მოვლენ? - დატოვეთ მათი ტრიბუნა ცარიელი და დანარჩენ პარტიებს მოგვეცით საშუალება, გავარკვიოთ ჩვენი ხედვები. მედია ნუ იქცევით პოლიტიკური მხარე - თუ ვინმე არ მოდის, ნუ მოვა - დატოვეთ სკამი ცარიელი“, - განაცხადა დავით უსუფაშვილმა.