„ერთიანი ნაციონალური მოძრაობის“ ერთ-ერთი ლიდერი დავით ბაქრაძე პრემიერ მინისტრ გიორგი კვირიკაშვილს დღეს ტელეკომპანია „რუსთავი 2“-ზე დებატებში მონაწილეობისკენ მოუწოდებს.

„დღეს „რუსთავი 2“-ზე დებატები უნდა გაიმართოს ძირითად პოლიტიკური პარტიების პირველ ნომრებს შორის. როგორც ჩვენთვის გახდა ცნობილი „ქართული ოცნების“ პირველი ნომერი გიორგი კვირიკაშვილი არ გეგმავს დღეს ამ დებატებზე მობრძანებას და „ქართული ოცნების“ მიმართ დაგროვილ შეკითხვების პასუხის გაცემას“, - განაცხადა დავით ბაქრაძემ და დასძინა, რომ  ეს არ არის პირველი შემთხვევა, როდესაც გიორგი კვირიკაშვილი თავს არიდებს დებატებს.

დავით ბაქრაძის თქმით, კვირიკაშვილს არ მიუღია მონაწილეობა არც ერთ სატელევიზიო ფორმატში მთელი კამპანიის განმავლობაში.

„მე, რა თქმა უნდა, მესმის, რომ მისთვის ძალიან მძიმე იქნება უპასუხოს ყველა იმ კითხვას და სამართლიან პრეტენზიას, რომელიც საზოგადოებაშია დაგროვილი „ქართული ოცნების“ მიმართ ქვეყნის უკუსვლის, შეუსრულებელი დაპირებების გამო, მაგრამ მოვუწოდებ მას დებატებში მონაწილეობას. დებატებში მონაწილეობა ნიშნავს საზოგადოების და ამომრჩევლის პატივისცემას. მე მას ველოდები „რუსთავი 2-ის ეთერში“, - განაცხადა დავით ბაქრაძემ და მან მოუწოდა პრემიერს, რომ პატივი სცეს საზოგადოებას და ამომრჩეველს და პასუხი გასცეს ყველა პრობლემას და საკითხს, რომელიც აწუხებს ამომრჩეველს.