„ქართული ოცნება - დემოკრატიული საქართველოს“ გენერალური მდივნის, ცენტრალური შტაბის უფროსის, კახა კალაძის განცხადებით, „ქართული ოცნება“ არავის მისცემს იმის შესაძლებლობას, რომ ქვეყანაში დააბრუნოს ძალადობა და ადამიანის ღირსებას შეეხოს.

ამის შესახებ მან ჩუღურეთის მაჟორიტარი დეპუტატობის კანდიდატის, გიორგი ვოლსკის საარჩევნო კამპანიის შემაჯამებელ ღონისძიებაზე განაცხადა.

„ჩვენ არ მივცემთ არავის იმის საშუალებას, რომ ბრძოლით, მშვიდობიანი გზით მოპოვებული თავისუფლება წაგვართვას... მე დარწმუნებული ვარ, ჩვენ ხმას მივცემთ ქვეყნის სწრაფ ეკონომიკურ განვითარებას. ეს არის ის, რაც ყველაზე მეტად ესაჭიროება ჩვენს ქვეყანას და სამშობლოს. ჩვენ ყველაფერი უნდა გავაკეთოთ, რომ რაც შეიძლება სწრაფად შევამციროთ სოციალურად დაუცველების რაოდენობა.  ჩვენ ყველაფერი უნდა გავაკეთოთ იმისთვის, რომ პენსიონერს ჰქონდეს ღირსეული ცხოვრება“, - განაცხადა კალაძემ.

მისივე თქმით, 4 წლის განმავლობაში გაზარდეს პენსია, მაგრამ ეს არ არის საკმარისი, თუმცა მეტია, ვიდრე იყო 2012 წელს.

„ჩვენ ვპირდებით, რომ ეკონომიკურ განვითარებასთან ერთად იქნება პენსიების მატება, იქნება ქვეყნის განვითარება. ჩვენ ვპირდებით მოსახლეობას, რომ 4 წლის თავზე გვექნება თვისობრივად განსხვავებული საქართველო, თვისობრივად განსხვავებული ინფრასტრუქტურით და თვისობრივად განსხვავებული შესაძლებლობებით.

მე არ დავიწყებ იმაზე საუბარს, თუ რა გავაკეთეთ 4 წლის განმავლობაში და რა პრობლემები აწუხებს ჩვენს მოსახლეობას. ეს ძალიან კარგად გვესმის. მიუხედავად მრავალი განხორციელებული პროექტისა და რეფორმისა, კარგად გვესმის ის პრობლემები, რომელიც რეგიონების და დედაქალაქის მოსახლეობას აწუხებს. ერთადერთი პოლიტიკური ძალა არის „ქართული ოცნება“, ვისაც ამ პრობლემების მოგვარების შესაძლებლობა აქვს”, - განაცხადა კალაძემ.