„ნაციონალური მოძრაობის“ ერთ-ერთი ლიდერის, გიგა ბოკერიას განცხადებით, თავდაცვის მინისტრ ლევან იზორიას ზეპირი ბრძანების გამო, ჯარისკაცების დიდი ნაწილი სამხედრო ნაწილებს ვერ დატოვებენ. შესაბამისად, ბოკერიას თქმით, სამხედროებს არჩევნებში მონაწილეობის შესაძლებლობა არ მიეცემათ.

„ნაციონალური მოძრაობის“ ერთ-ერთი ლიდერის მტკიცებით, იგივე სიტუაციაა პოლიციელებთან მიმართებაშიც.

„ჩვენთვის ცნობილი გახდა ივანიშვილის და მისი გუნდის უკანონო, მავნებლური განზრახვის შესახებ. ახალი რეგულაციებით, ჯარისკაცების უდიდესი ნაწილი ხმას მისცემს არა სპეციალურ უბნებზე, არამედ, უნდა მისცემოდათ საშუალება, რომ ხმა მიეცა იქ, სადაც ჩაწერილი იყო, საკუთარ მისამართზე. ჩვენს მიერ მოპოვებული ინფორმაციით, სამხედრო ნაწილებში ორი დღის წინ მივიდა მინისტრ ლევან იზორიას ზეპირი ბრძანება, რომ არ აინტერესებს კანონის მოთხოვნები და უდიდესი ნაწილი ჯარისკაცების დარჩებიან საკუთარ ნაწილებში, რის შედეგადაც მათ არჩევნებში მონაწილეობის შესაძლებლობა არ მიეცემათ. იდენტური ვითარებაა რიგით პოლიციელებთან მიმართებაში, სადაც, ჩვენი ინფორმაციით, მიღებულია გადაწყვეტილება, რომ დილის 08:00 საათიდან, 22:00 საათამდე მათი დიდი ნაწილი გადაყვანილი იქნებიან ყაზარმულ მდგომარეობაზე, მათაც არ მიეცემათ საკუთარი კონსტიტუციური უფლების განხორციელების შესაძლებლობა“, - განაცხადა გიგა ბოკერიამ.

პარტიის ერთ-ერთმა ლიდერმა ყოფილ პრემიერ მინისტრ ბიძინა ივანიშვილს და „ქართულ ოცნებას“ მოუწოდა, აღნიშნული გადაწყვეტილებები ხვალამდე შეცვალოს.

„მივმართავთ ივანიშვილს და მის გუნდს - გასაგებია, რომ გესმით და იცით, რომ ჯარის და პოლიციის დიდი ნაწილი არ უჭერს მხარს თქვენს პოლიტიკას, არ მოგცემთ თქვენ ხმას, მაგრამ ეს ვერ გიხსნით ხვალინდელი მარცხისგან და მეორეც, ეს არის ჩვენი ჯარის, პოლიციის და საზოგადოების შეურაცხყოფა. ხვალიდან მომდევნო ოთხი წელი უნდა იყოთ ოპოზიციაში, ძალიან ცუდია, რომ მთავარი ოპოზიციური ძალა ასეთი უკანონო ჟესტით წავა ხელისუფლებიდან“, - თქვა გიგა ბოკერიამ.