„ძალიან სამწუხაროა, რომ ქმნიან ისეთ მოლოდინს, თითქოს ლარი გაუფასურდება, რადგან მაკროეკონომიკურად ამის არანაირი საფუძველი არ არსებობს“,-განაცხადა პირველმა ვიცე პრემიერმა, ეკონომიკისა და მდგრადი განვითარების მინისტრმა, დიმიტრი ქუმსიშვილმა.

მისი თქმით, მაკროეკონომიკურად, არანაირი საფუძველი არ არსებობს, რომ ლარი გაუფასურდეს.

„მინდა გითხრათ, რომ, რა თქმა უნდა, ლარის კურსი ყალიბდება მოთხოვნა-მიწოდებით და ბაზარზე არსებული მდგომარეობით. აქვე მინდა აღვნიშნო, რომ ძალიან დიდი ზეგავლენები სავალუტო კურსზე აქვს მოლოდინებს და ძალიან სამწუხაროა, რომ ქმნიან ისეთ მოლოდინს, თითქოს ლარი გაუფასურდება, რადგან მაკროეკონომიკურად ამის არანაირი საფუძველი არ არსებობს. ჩვენი საგადასახდელო ბალანსი წინა წელთან შედარებით არის გაუმჯობესებული და ახლა მით უმეტეს, როცა ჩვენთან დამთავრდა ტურისტული სეზონი და შემოსული არის ქვეყანაში ვალუტა, ამას არაფერი არ მოასწავებს. რაც შეეხება სხვა ქვეყნებთან მიმართებაში ჩვენი ქვეყნის ვალუტის კურსი საკმაოდ სტაბილურია. ზოგადად, პროგნოზირება ძალიან უმადური საქმეა, თუმცა მაკროეკონომიკურად შემიძლია ვთქვა, რომ არანაირი საფუძველი ლარის გაუფასურების არ არის. ძალიან სამწუხარო იქნება, თუ მოლოდინებზე აყოლილი ჩვენი მოსახლეობა დაიწყებს დოლარის შეძენას, იმ შემთხვევაში თუ ეს მათ საჭიროებას არ წარმოადგენს“, - განაცხადა ქუმსიშვილმა.

ეროვნულმა ბანკმა (7 ოქტომბერი, 2016) ლარის ახალი ოფიციალური გაცვლითი კურსი დაადგინა, რომლის მიხედვითაც, ეროვნული ვალუტის კურსი დოლართან მიმართებაში 0.0026 პუნქტით გამყარდა. 1 აშშ დოლარის ოფიციალური ფასი 2.3337 ლარი გახდა. ეროვნული ბანკის მიერ დადგენილი ძველი კურსის მიხედვით, 1 აშშ დოლარი 2.3363 ლარი ღირდა. 0.0153 პუნქტით გამყარდა ეროვნული ვალუტის კურსი ევროსთან მიმართებაში და მისი ღირებულება 2.5986 ლარი გახდა. ძველი კურსით, მისი ოფიციალური ღირებულება 2.6139 ლარი იყო.