საქართველოს ახალგაზრდა იურისტთა ასოციაციის თავმჯდომარის, ანა ნაცვლიშვილის განცხადებით, ორგანიზაციის დამკვირვებლებმა სხვადასხვა საარჩევნო უბანზე გარკვეული ტიპის დარღვევები დააფიქსირეს.

"თბილისში, ნაძალადევის მე-18 უბანზე, ჩვენმა დამკვირვებელმა მოიპოვა "ქართული ოცნების" მაჟორიტარი კანდიდატის , სოფო კილაძის მხარდამჭერთა სია, რომელიც სავარაუდოდ, ერთ-ერთ აქტივისტს დარჩა უბანზე. ამ სიაში მოცემულია კონკრეტული ადამიანების სახელი, გვარი, პირადი მონაცემები.

ხმაური იყო დიდუბის მე-14 უბანზე, სადაც ჩვენი დამკვირვებლის ინფორმაციით, პრობლემა დაფიქსირდა, რადგან კომისიის წევრებმა ნაცვლად იმისა, რომ უბნის გახსნის შემდეგ საკონტროლო ფურცელი შეევსოთ, მათ შეავსეს შემაჯამებელი ოქმები, წინასწარ გააკეთეს ხელმოწერები, რაც დარღვევას წარმოადგენს. შემდეგ როდესაც მიხვდნენ, რომ შეცდომა დაუშვეს, უკვე დალუქული ყუთი გახსნეს, გარკვეული შესწორებები შეიტანეს და შემდეგ კიდევ დალუქეს. ესეც ცალკე დარღვევას წარმოადგენს.

მე-5 უბანზე დაფიქსირდა დარღვევა, როდესაც ჯერ მარკირება გაუკეთეს ამომრჩეველს და შემდეგ გადაამოწმეს, იყო თუ არა ეს პირი სიაში. აღმოჩნდა, რომ იმ უბანზე არ იყო ეს მოქალაქე დაფიქსირებული.

გარდაბანში, მე-6 უბანზე დაფიქსირდა შემთხვევა, რომ დამკვირვებლებს არ აძლევდნენ შესაძლებლობას, რომ ჩანაწერთა წიგნში დაეფიქსირებინათ შენიშვნები. ჩვენს დამკვირვებელსაც შეექმნა პრობლემა, როდესაც არ იბარებდნენ მისგან საჩივარს", - განაცხადა ანა ნაცვლიშვილმა საინფორმაციო ბრიფინგზე.