მოძრაობა „პაატა ბურჭულაძე - სახელმწიფო ხალხისთვის“ არჩევნებზე დაფიქსირებულ დარღვევებზე ინფორმაციას ავრცელებს.

როგორც მოძრაობის წარმომადგენელმა, დავით ჯანდიერმა განაცხადა, მათ დამკვირვებლებს არ უშვებენ საარჩევნო უბნებზე, იმ მოტივით, რომ ცენტრალური საარჩევნო კომისიის მიერ გაცემული მოწმობები შავ-თეთრია.

მისივე თქმით, თიანეთის გამგებელს სამსახურეობრივი ავტომობილებით მოქალაქეები ხმის მისაცემად დაჰყავს.

ბურჭულაძის პარტიაში სხვა დარღვევების შესახებაც საუბრობენ და ქვეყნის მასშტაბით მათ მიერ გამოვლენილი დარღვევების შესახებ ინფორმაციას ავრცელებენ:

„1. გარდაბანი, 21, 58, 59, 60, 61, სოფელი ყარაჯალა - დამკვირვებლები და წარმომადგენლები გამოუშვეს უბნებიდან, დატოვეს მხოლოდ „ნაციონალური  მოძრაობის“ და „ქართული ოცნების“ წარმომადგენლები;

2. საგარეჯო, 23-ე ოლქი - 6 ბიულეტინს ხელი არ მოაწერეს და დაკარგულია 6 ხმა;

3. ახალქალაქი,  46 ოლქი - 11 უბანზე გამოაქვთ ბიულეტენები ღიად, ანახებენ ხალხს. მე-3 უბანზე კომისიის წევრები შედიან კაბინებში ხმის მიცემის დროს;

4. დედოფლისწყარო, 25-ე ოლქი - მე-8 უბანზე, გადასატან ყუთზე არ გაატანეს მაჟორიტარული ბიულეტინი, საკონტროლო ფურცელს არა აქვს ბეჭედი;

5. ნინოწმინდა, 46 ოლქი - ღიად აძლევენ ხმას;

6. ჩხოროწყუ, 67 ოლქი, სოფელი ბიჯები - პოლიცია აგიტაციას ეწევა, კარამდე მიჰყავთ ხალხი, არსებობს ვიდეომასალა. პროკურორები, ძალოვანები მოძრაობენ მე-16 უბნის ეზოში;

7. ბორჯომი, 45 ოლქი - 20-ე უბანზე დამკვირვებელს არ აძლევს უფლებას, რომ პირადობები შეამოწმოს;

8. ნაძალადევი, 18 ოლქი - 56 -ე უბანზე ერთ პირს მისცეს ორი პროპორციული ბიულეტენი, რომელიც უკვე მოთავსდა ყუთში;

9. ლაგოდეხი, 26 ოლქი - მე-4 უბანზე ერთ ბიულეტენზე დაფიქსირდა სხვა ოლქის კანდიდატები, ახლა კარი დაკეტილია და შიგნით თათბირობენ;

10. ზუგდიდი, 65-66 ოლქში - მე-11 უბანზე მარკირების გარეშე შეუშვეს ამომრჩევლები კაბინაში, დაიწერა საჩივარი;

11. ჩუღურეთი, მე-14 ოლქი - მე-17 უბანზე გადასატანი ყუთი მოიტანეს და ამომრჩევლის ხელმოწერები არ იყო დაფიქსირებული. დაიწერა საჩივარი ყუთის ბათილობასთან დაკავშირებით. საუბარია 19 ამომრჩეველზე;

12. თიანეთის ოლქი - გამგებელი მანქანით მოძრაობს და მოჰყავს ამომრჩევლები საარჩევნო უბნებთან;

13. ვაზისუბანი -  63-ე უბანზე დაიკარგა რეგისტრატორის ბეჭედი. არის დიდი ალბათობა, რომ გარეთ გაიტანეს და არის „კარუსელი“ ალბათობა, არსებობენ მოწმეები. საჩივარი იწერება“,-ნათქვამია პაატა ბურჭულაძის მოძრაობის ინფორმაციაში.