ყოფილი პრეზიდენტის, მიხეილ სააკაშვილის განცხადებას, რომ საქართველოში დაბრუნებას არ აპირებს, პარტია "ქართული ოცნების" აღმასრულებელი მდივანი, ირკალი კობახიძე ეხმაურება.

"ძალიან საინტერესოა, რომ უკვე არჩევნების დღეს დაიხია ბატონმა მიხეილ სააკაშვილმა უკან. შეფასება თქვენთვის მომინდია. ეს ნათლად აჩვენებს იმ სურათს, რაც არის ჩამოყალიბებული დღეს საქართველოში, ყველა ხედავს ამომრჩევლის განწყობას და ეს განწყობა სათანადოდ დაფიქსირდება ცესკო-ს მიერ დღეს გამთენიისას“,- განაცხადა კობახიძემ.

საქართველოს ყოფილი პრეზიდენტის, ოდესის ოლქის გუბერნატორის მიხეილ სააკაშვილის განცხადებით, მას საქართველოში „თითსაც ვერავინ დააკარებს“, რადგან ჩამოსვლის შემთხვევაში მომხრეები, ასევე სამხედროები და სამართალდამცველები დაიცავენ.

ამის შესახებ სააკაშვილმა უკრაინულ ტელეკომპანია „112 Украина“-ის ეთერში განაცხადა.

„მათ სისხლის სამართლის საქმე აღძრეს, თუმცა ცოტა ხნის წინ თბილისის ცენტრში მიტინგი გაიმართა, სადაც 70 ათასი ადამიანი მივიდა, ეს ძალიან ბევრია, იგივეა, რომ უკრაინაში კრეშატიკზე500 ათასზე მეტი ადამიანი გასულიყო. ეს ნიშნავს, რომ მე იქ თითსაც ვერავინ დამაკარებს იმ პირობებში, როდესაც მთელი პოლიცია, შეიარაღებული ძალები ჩვენს მხარესაა, ანუ სახელმწიფოებრიობისა და კანონიერების მხარეს“, - განაცხადა სააკაშვილმა.

ოდესის ოლქის გუბერნატორმა ასევე აღნიშნა, რომ ის საქართველოში იმიტომ არ ჩამოვიდა, რომ ძალადობრივი ქმედებების გამოწვევა არ სურდა.

„წარმოიდგინეთ, ჩამოდის პოლიტიკოსი - ძველი, ცუდი, მას კი აეროპორტში ნახევარი მილიონი უკრაინელი ხვდება. როგორ დააკავებს მას ხელისუფლება?! ერთადერთი მიზეზი, რის გამოც არ ჩავედი,  არის ის, რომ არ მსურდა ეს ძალადობრივი ქმედებების მიზეზი გამხდარიყო“,  - თქვა მან და დასძინა, რომ საქართველოში ჩამოსვლას აუცილებლად გეგმავს, თუმცა ეს არ იქნება დაბრუნება, რადგან ის მუშაობის გაგრძელებას უკრაინაში აპირებს.