ჩვენ ორი თვის განმავლობაში მოვუწოდებდით მოსახლეობას აქტიურობისკენ და ის პროცენტი რაც დაჯდა მონაწილეობის, არის ძალიან მნიშვნელოვანი, - განაცხადა საქართველოს პრეზიდენტმა, გიორგი მარგველაშვილმა საგანგებო ბრიფინგზე.

პრეზიდენტის შეფასებით, წინასაარჩევნო პროცესი იყო მშვიდი და კონსტრუქციული რიგი გამონაკლისების გარეშე.

მისივე თქმით, არჩევნების დღემაც მშვიდად და მოსახლეობის აქტიურობით ჩაიარა.

"ფაქტიურად, ერთი-ორი გამონაკლისის გარდა, ჩვენს ქვეყანაში არჩევნების დღემ ჩაიარა მშვიდობიანად. სამწუხაროა, რომ დათვლის პროცესში გამოჩნდა რამდენიმე სერიოზული სამართალდარღვევა. მათ შორის, აგრესიული ქმედებები. ეს არის არამარტო სამწუხარო, არამედ ამ შემთხვევებს, ამ პროვოკაციულ შემთხვევებს რომელიც რამდენიმე უბანზე მოხდა, დროული, ძალიან სწრაფი რეაგირება სჭირდება. განსაკუთრებით იმის გათვალისწინებით, რომ 2016 წლის საპარლამენტო არჩევნები არ არის მხოლოდ 8 ოქტომბრის არჩევნები. ეს არჩევნები შეფასდება და ჩვენი ყველას მიზანია, რომ ეს არჩევნები შეფასდეს, როგორც მაღალი სტანდარტის არჩევნები. ეს არჩევნები შეფასდება როგორ 8 ოქტომბრით, ასევე იმ ექსცესებსა და ინციდენტებზე რეაგირებით, ასევე რანაირად ჩვენ მივალთ არჩევნების მეორე ტურებამდე და რანაირად ჩავატარებთ ამ მეორე ტურებს. მოლოდინი წინასწარი მონაცემებით არის, რომ არაერთი მეორე ტური იქნება", - განაცხადა პრეზიდენტმა საგანგებო ბრიფინგზე.

მანვე სამართალდაცავებს გამოვლენილ დარღვევებთან დაკავშირებით დროული და პრინციპული რეგირებისკენ მოუწოდა.