პარტია „ქართული ოცნება - დემოკრატიული საქართველოს“ ერთ-ერთი წევრის, თამარ ჩუგოშვილის განცხადებით, "ქართულმა ოცნებამ" დაახლოებით 20 მაჟორიტარულ ოლქში პირველივე ტურში მოიგო, ხოლო მეორე ტურების სიმრავლე განპირობებულია ძალიან მაღალი ბარიერით.

მისივე თქმით, საქართველოში ყოველმა მეორე ამომრჩეველმა „ქართულ ოცნებას“ დაუჭირა მხარი.

„შეგვიძლია ვთქვათ, რომ საქართველოში ყოველმა მეორე ამომრჩეველმა მხარი დაუჭირა „ქართულ ოცნებას“, რისთვისაც მადლობას ვუხდით ჩვენს ამომრჩეველს“,-აღნიშნა მან.

გუშინდელ დღეს რაც შეეხება, ძირითადად ჩაიარა მშვიდ, სამართლიან გარემოში, იყო მხოლოდ რამდენიმე ინციდენტი 4-5 საარჩევნო უბანზე. ჩვენი ინფორმაციით, გაბათილებულია მხოლოდ 2 უბნის შედეგები, ასევე გარკვეულ უბნებთან ადგილი ჰქონდა ინციდენტებს და ფიზიკურ დაპირისპირებას. გვინდა განსაკუთრებით გამოვეხმაუროთ მარნეულში მომხდარ სრულიად მიუღებელ ფაქტს, სადაც „ერთიანი ნაციონალური მოძრაობის“ მიერ ორგანიზებულმა ადამიანების ჯგუფმა შეტევა მიიტანეს საარჩევნო უბანზე, საფრთხე შეუქმნეს იქ მყოფ ადამიანებს, დაზიანება მიაყენეს პოლიციის წარმომადგენლებს და მათი ქცევა შეიცავდა ძალიან სერიოზულ კრიმინალურ ნიშნებს. ამას ხელმძღვანელობდა ერთიანი „ნაციონალური მოძრაობის“ მაჟორიტარობის კანდიდატი. ეს ინციდენტი ყოვლად მიუღებელი იყო.სამართალდამცველები ეფექტურად მოქმედებდნენ. დარწმუნებული ვართ, რომ მათ ქმედებას მოჰყვება გაგრძელება და დადგება იმ პირების პასუხისმგებლობა, ვინც მონაწილეობდნენ ინციდენტში“, - განაცხადა ჩუგოშვილმა.