საქართველოს პრეზიდენტი გიორგი მარგველაშვილი მოსახლეობას მოუწოდებს, არჩევნების მეორე ტურშიც იყვნენ აქტიურები.

როგორც პრეზიდენტის პრესსპიკერმა, ეკა მიშველაძემ დღეს გამართულ ტრადიციულ პრესკონფერენციაზე განაცხადა, არჩევნების ერთი ეტაპი დასრულდა, თუმცა საარჩევნო პროცესი გრძელდება და წინ არის ძალიან მნიშვნელოვანი ეტაპი.

„მოსახლეობამ 8 ოქტომბერს აირჩია პარლამენტის შემადგენლობის მხოლოდ 2/3, 50 მაჟორიტარულ ოლქში კი უნდა ჩატარდეს მეორე ტური. ეს არის ძალიან მნიშვნელოვანი პროცესი, რომელსაც პირველ რიგში სჭირდება ამომრჩევლის აქტიურობა. პრეზიდენტი ახლაც, ისევე, როგორც მთელი წინასაარჩევნო პერიოდის განმავლობაში, მოუწოდებს მოსახლეობას, დააფიქსირონ საკუთარი არჩევანი და იყვნენ აქტიური. ასევე უმნიშვნელოვანესია და განსაკუთრებით ხაზგასასმელია, საერთაშორისო და ადგილობრივი დამკვირვებლების როლი, როგორც მთელი არჩევნების, ასევე მეორე ტურის განმავლობაში. ქვეყნის პირველი პირი იმედს გამოთქვამს, რომ დამკვირვებლები განმეორებით ტურზეც ფართოდ იქნებიან წარმოდგენილი და აქვე აღვნიშნავ, რომ პრეზიდენტი მადლობას უხდის მათ გაწეული მუშაობისთვის”,- განაცხადა ეკა მიშველაძემ

საკონსტიტუციო უმრავლესობის მიღების შემთხვევაში, პრეზიდენტის არჩევის წესის შეცვლის შესაძლებლობის საკითხზე დასმულ შეკითხვაზე საპასუხოდ  კი მიშველაძემ განაცხადა, რომ პრეზიდენტი მოუწოდებს, „ქართულ ოცნებას“, კონცენტრირდეს მეორე ტურზე და ისეთი საარჩევნო დაპირებების შესრულებაზე, როგორიც არის სოციალური ვალდებულებების შესრულება, დასაქმება, ეკონომიკის გაჯანსაღება, ახალი პროექტების შექმნა.

მისივე თქმით, პრეზიდენტი მიიჩნევს, რომ „ქართული ოცნება“ უნდა კონცენტრირდეს ხალხზე, რომელზე ზრუნვაზეც აიღო პასუხისმგებლობა.

"პრეზიდენტი გააგრძელებს სამი წლის წინ დადებული ფიცის შესრულებას, რაც გულისხმობს იმას, რომ დაიცავს საქართველოს კონსტიტუციას, დამოუკიდებლობას და ასევე გააგრძელებს მოქალაქეთა უსაფრთხოებასა და კეთილდღეობისთვის ზრუნვას“, - განაცხადა მიშველაძემ.