აჭარის ავტონომიური რესპუბლიკის უმაღლესი საბჭოს არჩევნების პირველადი წინასწარი შედეგების შეჯამება დასრულდა.

პირველადი წინასწარი მონაცემებით, პროპორციული სისტემით ჩატარებულ არჩევნებში პირველ ადგილზეა „ქართული ოცნება - დემოკრატიული საქართველო,“ რომელმაც ხმების 45% მიიღო, ხოლო მეორეზე „ერთიანი ნაციონალური მოძრაობა“ ხმების 29.7%-ით. 5%-იანი ბარიერი წინასწარი მონაცემებით, გადალახული აქვს „ნინო ბურჯანაძე - დემოკრატიული მოძრაობისა“ (5.09%) და „დავით თარხან-მოურავი, ირმა ინაშვილი - საქართველოს პატრიოტთა ალიანსს“( 5.7% ).

რაც შეეხება მაჟორიტარულ არჩევნებს, მაჟორიტარულ ოლქებში საუკეთესო შედეგი აქვთ „ქართული ოცნება - დემოკრატიული საქართველოსა“ (41,01%) და „ერთიანი ნაციონალური მოძრაობის“ (33,65%) კანდიდატებს.

უსკო-ს ცნობით, არსებულ წინასწარ მონაცემებზე, დაყრდნობით, სავარაუდოდ ექვსივე მაჟორიტარულ ოლქში საჭირო გახდება მეორე ტურის ჩატარება, რადგან ვერცერთი სუბიექტის კანდიდატმა ვერ გადალახა 50%-იანი ზღვარი.

აჭარის ავტონომიური რესპუბლიკის უმაღლესი საბჭოს არჩევნები საქართველოს პარლამენტის არჩევნების პარალელურად გაიმართა.

აჭარის უმაღლესი საბჭოს არჩევნებში 11 პარტია და 4 საარჩევნო ბლოკი მონაწილეობდა. საკანონმდებლო ორგანოს შემადგენლობა 21 დეპუტატისგან შედგება. სადეპუტატო მანდატს მოიპოვებს 15 პროპორციული და 6 ერთმანდატიან საარჩევნო ოლქებში გამარჯვებული კანდიდატები.