მოძრაობის „სახელმწიფო ხალხისთვის“ ლიდერის, პაატა ბურჭულაძის განცხადებით, ის პარტიაში რჩება, თუმცა რეორგანიზება მოხდება.

როგორც მან ჟურნალისტებს თათბირის დაწყებამდე განუცხადა, „სახელმწიფო ხალხისთვის“ მალე ყრილობის ჩატარებას გეგმავს.

„მოხდა დიდი რამ - ჩამოყალიბდა ახალგაზრდა, პროფესიონალებით დაკომპლექტებული მომავლის პარტია, რომელიც მომავალ არჩევნებშიც მიიღებს მონაწილეობას. მე ვარ უბედნიერესი ადამიანი, რომ შევძელი და ახალი, ჯანსაღი ძალა შემოვიყვანე ქართულ პოლიტიკაში, რომელიც არის საქართველოს მომავალი. მე ვრჩები ამ პარტიაში, რეორგანიზაცია მოხდება და ჩვენ ყრილობა გვექნება სულ ცოტა ხანში. ახლა თათბირი მიმდინარეობს, კოალიცია ჯერჯერობით არის და ალბათ იქნება იმიტომ, რომ ეს ყველას აწყობს. დღეს საქართველო არის ღრმა კრიზისში, საიდანაც ჩვენი მოძრაობა გამოიყვანს“, - განაცხადა პაატა ბურჭულაძემ.