საგარეო უწყების ხელმძღვანელმა, მიხეილ ჯანელიძემ დიასპორის საკითხებში საქართველოს სახელმწიფო მინისტრს გელა დუმბაძეს უმასპინძლა, რომელმაც მიხეილ ჯანელიძეს ლევილის მამულის სიმბოლური გასაღები გადასცა.

შეხვედრას დიასპორის საკითხებში სახელმწიფო მინისტრის აპარატისა და საქართველოს საგარეო საქმეთა სამინისტროს წარმომადგენლები ესწრებოდნენ.

სახელმწიფო მინისტრმა მადლობა გადაუხადა საგარეო საქმეთა სამინისტროს და საფრანგეთში საქართველოს საელჩოს ლევილის მამულის გადმოცემის პროცესში გაწეული მნიშვნელოვანი საქმიანობისა და ძალისხმევისთვის.

საგარეო საქმეთა სამინისტროს ცნობით, ლევილის მამული საქართველოს 25-წლიანი ისტორიული პროცესის დასრულების შემდგომ 2016 წლის 23 სექტემბერს დაუბრუნდა. პარიზიდან 37 კილომეტრში მდებარე 45 000 კვადრატული მეტრი ფართობის ისტორიული მამულის საქართველოსათვის გადმოცემის აქტს ლევილის მამულში ხელი მოაწერეს დიასპორის საკითხებში საქართველოს სახელმწიფო მინისტრმა, გელა დუმბაძემ და ფრანგული მხარიდან საქართველოს დემოკრატიული რესპუბლიკის (1918-1921) მთავრობის წევრთა ოჯახების წარმომადგენლებმა.

ისტორიული აქტის ხელმოწერის ცერემონიას საქართველოს იუსტიციის მინისტრი თეა წულუკიანი, საქართველოს საგარეო საქმეთა მინისტრის მოადგილე გიგი გიგიაძე, საქართველოს საგანგებო და სრულუფლებიანი ელჩი საფრანგეთის რესპუბლიკაში ეკატერინე სირაძე-დელონე, საქართველოს საგანგებო და სრულუფლებიანი დესპანი საფრანგეთში გოჩა ჯავახიშვილი, ქალაქ ლევილის მერიისა და ქართული დიასპორის წარმომადგენლები ესწრებოდნენ.

ლევილის მამული საქართველოს პირველი რესპუბლიკის მთავრობის წევრებმა 1927 წელს შეიძინეს. საბჭოთა ოკუპაციის განმავლობაში ლევილში ანექსირებული საქართველოს პოლიტიკური ემიგრაცია დაფუძნდა. 89 წლის შემდეგ კი ლევილის მამული საქართველოს დაუბრუნდა.