ფინანსთა მინისტრის, ნოდარ ხადურის განცხადებით, ლართან დაკავშირებით, კონკრეტული პროგნოზების გაკეთება არ შეიძლება.

როგორც მან ჟურნალისტებთან საუბრისას აღნიშნა, საშუალოვადიან პერსპექტივაში გაცვლითი კურსი დასტაბილურდება და გამყარდება.

„საშუალოვადიან პერსპექტივაში ჩვენ ნამდვილად ველოდებით გაცვლითი კურსის დასტაბილურებას და გამყარებას. ეს არის მოკლევადიანი რყევები, რაზეც საქართველოს ეროვნულმა ბანკმა განცხადება გააკეთა“, - განაცხადა ხადურმა.

რაც შეეხება ჟურნალისტის შეკითხვას თუ რამდენად მოქმედებს ბიუჯეტის ხარჯვითი ნაწილი ლარის გაცვლით კურსზე, რაზეც ოპონენტები საუბრობენ,  ნოდარ ხადურმა ოპონენტებს მოუწოდა, ოდნავი ობიექტურობა შეინარჩუნონ.

„თუ თქვენ გადახედავთ საერთაშორისო საფინანსო ინსტიტუტების, მათ შორის სავალუტო ფონდის დასკვნებს და პროგნოზებს, რომლებიც მათ აქვთ, ეს პროგნოზები რეალისტურია და არავის დაუყენებია ისინი ეჭვქვეშ. მომავალი წელი გაცილებით უკეთესი იქნება. წელსაც უფრო მეტ ეკონომიკურ ზრდას ველოდებით, ვიდრე ეს თავიდან იყო დაგეგმილი. ამავე დროს ისინიც, ეროვნული ბანკიც და ყველა ვთანხმდებით, რომ ბოლო წლების განმავლობაში ბიუჯეტის ხარჯებს არ გამოუწვევია და არც შეეძლო გამოეწვია გაცვლით კურსზე ზემოქმედება, ამიტომ მე მოვუწოდებ ოპონენტებს, რომ ოდნავი ობიექტურობა შეინარჩუნონ და საკუთარი პოლიტიკური დივიდენდების მოსაპოვებლად ნუ გააკეთებენ ისეთ განცხადებას, რომელიც ეჭვქვეშ დააყენებს მათ ავტორიტეტს“, - განაცხადა ნოდარ ხადურმა.

ეროვნულმა ბანკმა (12 ოქტომბერი, 2016) ლარის ახალი ოფიციალური გაცვლითი კურსი დაადგინა, რომლის მიხედვითაც, ეროვნული ვალუტის კურსი დოლართან მიმართებაში 0.0162 პუნქტით გაუფასურდა. 1 აშშ დოლარის ოფიციალური ფასი 2.3527 ლარი გახდა. ეროვნული ბანკის მიერ დადგენილი ძველი კურსის მიხედვით, 1 აშშ დოლარი 2.3365 ლარი ღირდა. 0.0020 პუნქტით გაუფასურდა ეროვნული ვალუტის კურსი ევროსთან მიმართებაში და მისი ღირებულება 2.5920 ლარი გახდა. ძველი კურსით, მისი ოფიციალური ღირებულება 2.5900 ლარი იყო.