თბილისის 23 ქუჩის რეაბილიტაციაზე დაახლოებით 9 მილიონი ლარი დაიხარჯა, განაცხადა თბილისის მერმა, დავით ნარმანიამ მერიაში მთავრობის სხდომის მიმდინარეობისას.

დედაქალაქის მერის თქმით, ბოლო პერიოდში ოპონენტების მხრიდან აჟიოტაჟია ატეხილი გზებზე სამუშაოების შესრულებასთან დაკავშირებით. ნარმანიამ აღნიშნა, რომ 2014 წლიდან დაიწყო და 2015 წელში გაგრძელდა 23 ქუჩის საგზაო სამუშაოების რეაბილიტაცია, რომელთა ჯამური ღირებულება 9 მილიონ ლარს შეადგენს.

მისივე განცხადებით, ამ სამუშაოების უმეტესობა უკვე დასრულებულია. ამჟამად სამუშაოები მიმდინარეობს 10 ქუჩაზე. ნარმანიამ აღნიშნა, რომ მიმდინარეობს ზამთრის შედეგად დაზიანებული ქუჩების აღდგენაც და გზის სარეაბილიტაციო სამუშაოები გაზაფხულზეც აქტიურად გაგრძელდება.

ნარმანიას უმოქმედობაში "ნაციონალური მოძრაობა" ადანაშაულებს. თბილისის მერობის ყოფილი კანდიდატის, ნიკა მელიას თქმით, დედაქალაქსა და მის გარშემო ათამდე ასფალტის ქარხანაა და ყველა მათგანი, ხელისუფლების უნიათობის გამო, გაჩერებულია და შესაბამისად, შეჩერებულია თბილისში გზების სარეაბილიტაციო სამუშაოებიც.

„ამინდი არის არაჩვეულებრივი, არც ყინვა, არც ნალექია. მაშინ როდესაც საგზაო სამუშაოები უნდა მიმდინარეობდეს და შეკვეთებს ვერ უნდა აუდიოდნენ ეს ქარხნები, ჩვენ ვხედავთ, რომ მერია იმდენად უუნაროა, რომ ყველა ქარხნა არის გაჩერებული. ამიტომ მოვუწოდებ დედაქალაქის მერიას რეალური საქმით დაკავდნენ, მათი უუნარობა უკვე ვერანაირ კრიტიკას ვერ უძლებს,“ აცხადებს ნიკა მელია.