კომპანია "ჯორჯიან უოთერ ენდ ფაუერი" თებერვლის დასაწყისში დედაქალაქში მოსალოდნელ ძლიერ ყინვასთან დაკავშირებით მოსახლეობას რეკომენდაციით მიმართავს. კომპანია მოუწოდებს მათ თადარიგი დაიჭირონ და შეფუთონ ან დაათბუნონ თავიანთი კუთვნილი წყალსადენისა და საკანალიზაციო მიწისზედა ქსელები, ანუ კუთვნილი ღია კომუნიკაციები, რომლითაც მათ ონკანამდე წყალი მიეწოდებათ.

"ჯორჯიან უოთერ ენდ ფაუერი" ასევე, სთხოვს თბილისელებს, შეფუთონ ის აღრიცხვის კვანძები, რომელიც დამონტაჟებულია მათ ეზოებსა და ღია ტიპის ნაგებობებში.

"აღნიშნული ქმედებით კომპანიის აბონენტები შეძლებენ თავიდან აიცილონ რიგი პრობლებები და შეფერხებები წყლის მიწოდებაში, რაც შესაძლებელია გამოიწვიოს ლოკალურმა ავარიულმა დაზიანებამ მომხმარებლის კუთვნილ ქსელზე, მილებში წყლის გაყინვამ და მრიცხველის მწყობრიდან გამოსვლამ" - აღნიშნულია "ჯორჯიან უოთერ ენდ ფაუერის" განცხადებაში.

კომპანიის რეკომენდაცია სასურველია გაითვალისწინოს თბილისის მოსახლეობისა და კომერციული სექტორის იმ ნაწილმა, რომელიც ცხოვრობს ან საქმიანობას ეწევა ისეთ კერძო სახლებში, თბილისულ ეზოებსა და მრავალბინიან საცხოვრებელ კორპუსებში, რომელსაც სასმელი წყალი ღია კომუნიკაციებით მიეწოდება და აღრიცხვის კვანძები დამონტაჟებული აქვს ეზოებსა და ღია ტიპის ნაგებობებში.

ამას გარდა, "ჯორჯიან უოთერ ენდ ფაუერი" ძლიერი ყინვის პერიოდში, მკაცრ კონტროლს დააწესებს დედაქალაქის იმ ქუჩებზე, სადაც მეტად მოძველებული თუ ამორტიზებული ქსელებია და სადაც არ არის გამორიცხული, თავი იჩინოს ავარიულმა დაზიანებებმა.

სინოპტიკოსები უახლოეს დღეებში ძლიერ ყინვებს ელოდებიან. თბილისში ტემპერატურა ამაღამ -6 გრადუსამდე, ხვალ ღამით კი -10 გრადუსამდე დაეცემა. ყინვები მთელი საქართველოს მასშტაბით 10 თებერვლამდე გაგრძელდება, თუმცა 5 თებერვლიდან ის შედარებით შესუსტდება.

http://www.newspress.ge/sazogadoeba/36275-mosalodnel-yinvasthan-dakavshirebith-jorjian-uother-end-faueri-mosakhleobas-rekomendaciith-mimarthavs.html