ტელეკომპანია „რუსთავი 2“-ის გენერალური დირექტორის, ნიკა გვარამიას განცხადებით, სამაუწყებლო კომპანია პროდასავლურ პარტიებს უფრო მეტ საეთერო დროს გამოყოფს.

ამის შესახებ გვარამიამ გადაცემა „არჩევანში“ განაცხადა.

სამაუწყებლო კომპანიის გენერალური დირექტორის თქმითვე, „რუსთავი 2“ ყოველთვის აძლევდა პროდასავლურ ძალებს საშუალებას, საზოგადოებამდე მიეტანათ სათქმელი და მომავალში მათ ამის საშუალებას უფრო ხშირად მისცემს.

გვარამია ამბობს, რომ ქვეყანაში შექმნილი მდგომარეობიდან გამომდინარე, მედიის როლი და განსაკუთრებით პროდასავლური მედიის როლი ძალიან მნიშვნელოვანია.

„ჩვენი მედიის როლი და განსაკუთრებით მთავარი პროდასავლური მედიის, ნაციონალური მედიებიდან ერთადერთი პროდასავლური მედიის როლი იქნება გადამწყვეტი. „რუსთავი 2“-ის ფასმა აიწია 10-ჯერ იმიტომ, რომ „რუსთავი 2“ დარჩა ერთადერთი ფანჯარა ევროპაში, სადაც ყველა ადამიანის, მათ შორის „ნაციონალური მოძრაობის“ საუბარი პარლამენტში ვერაფერს ვერ იზამს, თუ ეს ფართო ეთერებში არ მოხვდა. „ნაციონალური მოძრაობის“ წევრებიც  და სხვა პროდასავლური ძალები უნდა იყვნენ წარმოდგენილნი „რუსთავი 2“-ზე, ეს პარტიები ყოველთვის იყვნენ და კიდევ უფრო ფართოდ იქნებიან წარმოდგენილები მომავალში.  ეს არ არის არცერთი პოლიტიკური პარტიის და ლიდერის არხი. დღეიდან ჩვენ ყველაფერს გავაკეთებთ, რომ მინიმალური პრეტენზიის საშუალება მივცეთ ვინმეს იმის სათქმელად, რომ ეს „ნაციონალური მოძრაობის“ ან მიხეილ სააკაშვილის არხია. ეს არის ყველა პროდასავლური პარტიის არხი და აქ ყველანი იქნებიან წარმოდგენილები“, - განაცხადა გვარამიამ.

ამასთან, ის „რუსთავი 2“-ს დაკვეთით ჩატარებულ ეგზიტ პოლებსა და ცესკო-ს მონაცემებს ეხმაურება და აცხადებს, რომ დიდი ცდომილების მიზეზი არჩევნებზე არსებული გაყალბებაა.

„იმ პარტიას, რომლის სასარგებლოდაც ხდებოდა გაყალბება ამ არჩევნებზე, ჩვენს ეგზიტ პოლებში ჰქონდა, დაახლოებით, 10%-იანი განსხვავება, ხოლო იმ პარტიის მონაცემები, რომლის წინააღმდეგაც ხდებოდა გაყალბება, ცდომილება მინუს 5%-ია. იმედზე ჩატარებული ეგზიტ პოლებში დაწერილი 54% კი იმ პარტიას, რომლის სასარგებლოდაც ხდებოდა გაყალბება, თვით ცესკო-მაც ვერ დაუწერა ეს მაჩვენებელი, ხოლო ვის წინააღმდეგაც ხდებოდა გაყალბება, იმ პარტიას იმედის ეგზიტ პოლებით მიღებული 19%-ის ნაცვლად ცესკო-მ 28% დაუწერა. ეს არის გაუგონარი შედეგები“, - განაცხადა ნიკა გვარამიამ.