„პაატა ბურჭულაძე – სახელმწიფო ხალხისთვის“ პარტიის ოფისში ბლოკში შემავალი პარტიები შეხვედრას მართავენ.

როგორც შეხვედრის დაწყებამდე ბლოკში შემავალი პოლიტიკური ძალების ლიდერებმა განაცხადეს, დღევანდელი შეხვედრა შეეხება ბლოკის სამომავლო გეგმებს, ასევე პარტიების შეხედულებებს ერთობლივი თანამშრომლობის შესახებ.

როგორც პარტია „ახალი საქართველოს“ ლიდერმა, გიორგი ვაშაძემ შეხვედრის დაწყებამდე განაცხადა,  თანამშრომლობა მნიშვნელოვანია პოლიტიკურ ძალებთან, თუმცა მანამდე იქნება მსჯელობა, თუ რა ფორმით გააგრძელებენ თანამშრომლობას ბლოკში შემავალი პარტიები სამომავლოდ.

„ბლოკი სამართლებრივად არის საარჩევნო თემა, მაგრამ თანამშრომლობა მნიშვნელოვანია სხვადასხვა პოლიტიკურ ძალებთან, ამიტომ გვექნება მსჯელობა რა ფორმით გავაგრძელებთ თანამშრომლობას. პროდასავლურ ფლანგთან დაკავშირებით მნიშვნელოვანია მისი ჩამოყალიბება, თუ ვის მოვიაზრებთ, ეს გადაწყვეტილება მას შემდეგ გახდება ცნობილი, რაც შეხვედრა დასრულდება და გადავწყვეტთ, თუ რამდენი პოლიტიკური ძალა რჩება ბლოკში“, - განაცხადა ვაშაძემ.

„ახალი მემარჯვენეების“ ლიდერის, მამუკა კაციტაძის თქმით კი შესაძლოა, პარტნიორთა წრე გაიზარდოს.

„მსჯელობა გვექნება მომავალ პოლიტიკურ ცხოვრებასთან დაკავშირებით, მიმაჩნია, რომ თანამშრომლობა უფრო მაღალ ხარისხში უნდა გადავიდეს. ასევე შესაძლოა პარტნიორთა წრე კიდევ უფრო გაიზარდოს, იმიტომ, რომ შექმნილ პოლიტიკურ ვითარებაში ცალ-ცალკე პარტიები რეალურ შედეგს ვერ დააყენებენ“, - განაცხადა მამუკა კაციტაძემ.