რუსთავის საქალაქო სასამართლო ყიზილაჯლოში მომხდარ დაპირისპირებაში ბრალდებულებისთვის აღკვეთის ღონისძიების შეფარდებაზე მსჯელობს.

როგორც ადვოკატმა, გიორგი კონდახაშვილმა განაცხადა, არც ერთი დაკავებული თავს დამნაშავედ არ ცნობს. მისივე თქმით, ამ დროისთვის პროკურატურის თხოვნა დაკავებულებისთვის აღკვეთის ღონისძიების სახით პატიმრობის შეფარდების თაობაზე, არის შეუასაბამო, რადგან საქმეში არ არის ისეთი მტკიცებულების სტანდარტი, რომ მათ მიმართ რაიმე სახის აღკვეთი ღონისძიება იყოს გამოყენებული.

„როგორც ჩვენთვის არის ცნობილი, პროკურატურა ითხოვს აღკვეთი ღონისძიების სახით პატიმრობას, რაც ჩვენი ხედვით არის სრულიად შეუსაბამო კანონის მოთხოვნებთან. ჩვენ შევეცდებით, სასამართლო დავარწმუნოთ, რომ არანაირი აღკვეთი ღონისძიება მათ მიმართ არ გამოიყენოს, ვინაიდან ადგილი აქვს, ჩვენი დაცვის ქვეშ მყოფების თვალთახედვით, მოსახლეობის დაშინებას წინა საარჩევნოდ, რომ მეორე ტურში მოხდეს ამომრჩევლების პასიურობა. თუკი სასამართლო აღკვეთ ღონისძიებაზე მაინც იმსჯელებს, ალტერნატივის სახით ჩვენ გირაოს შევთავაზებთ. ჩვენ მიგვაჩნია, რომ დღეის მდგომარეობით საქმეში არ არის ისეთი მტკიცებულების სტანდარტი, რომ მათ მიმართ რაიმე სახის აღკვეთი ღონისძიება იყოს გამოყენებული. ამასთან, მიგვაჩნია, რომ ორივე სახის ბრალდება, რომელიც წარდგენილი აქვთ, როგორც პოლიციის წინააღმდეგობის, ასევე საარჩევნო ადმინისტრაციის ხელისშეშლის ნაწილში, არის დაუსაბუთებელი",- განაცხადა კონდახაშვილმა.