„თბილისობა 2016“ -ის ფარგლებში, ევროპის მოედანზე მასშტაბური სკულპტურა „სიცოცხლის ხე“ დაიდგა.

თბილისის მერიის ცნობით, 9-მეტრიანი სკულპტურული კომპოზიცია ძველი თბილისის თემატიკაზეა შექმნილი. პროექტი მოქანდაკე დავით მონავარდისაშვილის ავტორობითა და თბილისის მერიის ინიციატივით განხორციელდა.

წელს, რიყე „ახალ ტფილისთან“ და ლეღვთახევთან ერთად, თბილისობის ღონისძიებებით ყველაზე დატვირთული ადგილია. ფესტივალის ფარგლებში, რიყესა და ევროპის მოედანზე სხვადასხვა კულტურული და სპორტული, საბავშვო გასართობი ღონისძიებები და კულინარიული გამოფენა-გაყიდვა მოეწყობა.

რიყის პარკი ორი დღით საბავშვო ქალაქად გადაიქცევა. „თბილისობა 2016“-ის პატარა სტუმრებისთვის უკვე მზად არის საბავშვო თეატრი და ქვიშის ქალაქი, სადაც მხიარული შეჯიბრებები, საბავშვო დისკოთეკა და სხვა სახალისო აქტივობები გაიმართება. პარკში ასევე განთავსებულია რაგბის, მინი გოლფის, კალათბურთისა და ფეინთბოლის მოედნები.

რიყის პარკის ქვედა ტერასაზე დასრულებულია კულინარიის ქუჩის მოწყობა, სადაც გურმანებს ქართული და უცხოური სამზარეულოს დაგემოვნება შეეძლებათ.