22 ოქტომბერს ქალაქ სიღნაღში ადგილობრივი თვითმმართველობის ორგანიზებით „ღვინის ფესტივალი“ გაიმართება. როგორც Guardian.ge-ს სიღნაღის მუნიციპალიტეტის გამგეობიდან აცნობეს, საფესტივალო სვლა ბარათაშვილის ქუჩიდან დაიწყება. ქალაქს იმერეთიდან, სამეგრელოდან, აჭარიდან და აფხაზეთიდან ჩამოსული ქართველები ესტუმრებიან, რომლებიც თავიანთ კუთხურ სამზარეულოს წარმოადგენენ. ღვინის მარნები სტუმრებს ევროპული ღვინის დეგუსტაციას შესთავაზებენ.

"ქუჩის მთელ პერიმეტრზე, ძველ სიღნაღურ აივნებზე ხალიჩები გამოიფინება, განლაგდება კასრები, სადაც ე.წ. „გლეხური“ წესით დამზადებული ღვინო და კუთხური სამზარეულო იქნება წარმოდგენილი. გამოცხვება „დედას პური“ და კახური ნაზუქი, შეიწვება მწვადი, მოდუღდება თათარა, რომელშიც მონაწილეობის მიღება ნებისმიერი სტუმრისთვის შესაძლებელი იქნება. ქალაქი არც ხელოვნების მოყვარულებს დატოვებს უყურადღებოდ. სიღნაღს თბილისის სამხატვრო აკადემიის სტუდენტები საკუთარი ნახატებით ეწვევიან. ბარათაშვილის ქუჩაზე ასევე საქართველოს სხვადასხვა კუთხიდან მოწვეული ხალხური რეწვის ოსტატთა ნამუშევრების (ხალიჩა, ფარდაგი, თექა, ქვილთი, გობელენი და სხვა აქსესუარები) გამოფენა-გაყიდვა გაიმართება", - აცხადებენ სიღნაღის მუნიციპალიტეტის გამგეობაში.

ღვინის ფესტივალი ერეკლე II-ის მოედანზე გამართული კონცერტით დასრულდება, რომელშიც მონაწილეობას არა მხოლოდ საქართველოს ყველა კუთხიდან მოწვეული ანსამბლები, არამედ, ბალტიისპირეთიდან, ინდოეთიდან და ინგუშეთიდან ჩამოსული ანსამბლებიც ეწვევიან და წელს პირველად, სიღნაღში საკუთარ ფოლკლორს წარმოადგენენ.

ამ დღეს ადგილობრივი თვითმმართველობა სიღნაღის საპატიო მოქალაქეებს აირჩევს.

ღვინის ფესტივალი 12:00 საათზე დაიწყება და მთელი დღის განმავლობაში გასტანს.