საქართველოს ყოფილი პრეზიდენტი, ოდესის ოლქის გუბერნატორი მიხეილ სააკაშვილი სტრასბურგში, უკრაინის შესახებ მომზადებული რეზოლუციების კენჭისყრაში, ქართული დელეგაციის წევრების არდასწრების საკითხს ეხმაურება და აცხადებს, რომ ეს არის სირცხვილი.

ამის შესახებ სააკაშვილის „ფეისბუქის“ ოფიციალურ გვერდზე ვიდეო გამოქვეყნდა.

„ის, რომ საქართველოს დელეგაციამ ხმა არ მისცა რუსეთის წინააღმდეგ სანქციებს და მხარი არ დაუჭირა უკრაინას, ეს არის სირცხვილი. მაგრამ ჩვენ უნდა გავითვალისწინოთ, თუ რა მდგომარეობაშია საქართველო. საქართველოს „გაზპრომის“ მსხვილი კერძო აქციონერი ბიძინა ივანიშვილი მართავს, რომელიც მანიპულაციების, ფალსიფიცირებისა და ძალადობის გზით ლიდერობს არჩევნების პირველ ტურში, მაგრამ წინ კიდევ მეორე ტურია.

მე სრულიად დარწმუნებული ვარ, რომ უკრაინასთან მიმართებაში ეს სასირცხვილო პოზიცია, რომელიც საქართველოს ისტორიაში შავ ლაქად დარჩება, არ ასახავს ქართველი საზოგადების მოსაზრებას. არ მინახავს ქართველი, რომელიც მხარს არ უჭერს უკრაინას. მინდა ხალხს შევახსენო, რომ ასობით ქართველი იბრძოდა და იბრძვის აქ ფრონტზე მოხალისედ. სამწუხაროდ ათზე მეტი დაიღუპა ბრძოლაში, მათ თავი გასწირეს მაიდანზე. ეს ალბათ ის ქვეყანაა, საიდანაც უკრაინაში ყველაზე მეტი მოხალისე ჩამოვიდა, თან საქართველო ხომ პატარა ქვეყანაა და ეს საქციელი ასახავს ქართველების პოზიციას, თუმცა საქართველოს ხელისუფლებამ მათ წინააღმდეგაც აღძრა სისხლის სამართლის საქმე და მათ მხოლოდ იმიტომ არ შეუძლიათ სამშობლოში დაბრუნება, რომ რუსეთის წინააღმდეგ იბრძოდნენ. ისინი  სისხლის სამართლის დევნას აწარმოებენ იმ ადამიანების წინააღმდეგ, რომლებიც საკუთარი სიცოცხლის ფასად იცავენ უკრაინას.

ჩემი აზრით, ეს დროებითია, როგორც იანუკოვიჩის მმართველობა იყო დროებითი და დიდხანს ვერ გაძლო, ისე ვერ გაგრძელდება ივანიშვილის მმართველობა. მეცოდება ჩემი ერი და მრცხვენია მისი ეგრეთ წოდებული მმართველების გამო“, - აცხადებს მიხეილ სააკაშვილი.

მიმდინარე წლის 12 ოქტომბერს ევროპის საბჭოს საპარლამენტო ასამბლეამ უკრაინასთან დაკავშირებით ორი რეზოლუცია მიიღო. ევროპის საბჭოს საპარლამენტო ასამბლეის ვებგვერდზე გამოქვეყნებული კენჭისყრის შედეგებიდან ირკვევა, რომ საქართველოს დელეგაციის არცერთ წევრს არცერთი რეზოლუციის კენჭისყრაში მონაწილეობა არ მიუღია.

როგორც ქართული დელეგაციის ერთ-ერთი წევრი ზვიად კვაჭანტირაძე აცხადებს, საქართველოს დელეგაცია კენჭისყრის დროს შვეიცარიის დელეგაციას ხვდებოდა, თუმცა, მისი თქმით, საქართველოს დელეგაციამ ადამიანის უფლებათა და იურიდიულ კომიტეტზე უკრაინელების ყველა შესწორებას დაუჭირა მხარი და რეზოლუცია სწორედ ისეთი სახით გავიდა, რასაც მხარი დაუჭირეს კომიტეტზე.