პარლამენტის თავმჯდომარის, დავით უსუფაშვილის განცხადებით, „რესპუბლიკური პარტია“ არჩევნებზე ყოფილი პრემიერ მინისტრის, ბიძინა ივანიშვილის ურჩობისთვის დაისაჯნენ.

ამის შესახებ უსუფაშვილმა გაზეთ „კვირის პალიტრასთან“ ინტერვიუში განაცხადა.

პარლამენტის თავმჯდომარის თქმით,  მას ურჩევნია დაისაჯოს, ვიდრე არასწორი ნაბიჯისთვის დააჯილდოონ.

„რა თქმა უნდა, ბიძინა ივანიშვილის ურჩობისთვის დავისაჯეთ და ეს იგრძნობოდა ჩემს ოლქში და ზოგადად, პარტიის მიმართაც. თუმცა, მირჩევნია დავისაჯო, ვიდრე არასწორი ნაბიჯისთვის დამაჯილდოონ“, - განაცხადა უსუფაშვილმა და დასძინა, რომ საბურთალოს ოლქში, სადაც ის მაჟორიტარი დეპუტატობის კანდიდატად იყრიდა კენჭს „ქართული ოცნების“ მიერ დიდი ფინანსური რესურსი დაიხარჯა გამარჯვებისთვის.

„გაყალბება ნიშნავს, რომ 80 ხმის ნაცვლად 10-ს გიწერენ, თუმცა მარტივი მეთოდებიც არსებობს - მაგალითად, თუ არჩევნებისთვის პარტიას აქვს ათასი ლარი, მაგრამ იმის ნაცვლად, რომ ეს თანხა ყველა ოლქზე თანაბრად გადაანაწილოს, ფინანსების 1/3-ს რატომღაც მხოლოდ ერთ ოლქში ხარჯავს, რადგან ამ ოლქში საკუთარი კანდიდატის გამარჯვება პრინციპის საკითხია“,-თქვა მან.

დავით უსუფაშვილმა ასევე განაცხადა, რომ ის მარცხისთვის მზად იყო, თუმცა ახლა „ქართული ოცნების“ მაჟორიტარ კანდიდატს არ გაუმარჯვია, რადგან გაიმარჯვა, რესურსმა და ტალღამ, რაც „ქართულ ოცნებას ორივე არჩევნებისას ჰქონდა.

„ნებისმიერ კონკურენციას შესაძლო მარცხი თან ახლავს, მე ამისთვის მზად ვიყავი - ამ ფაქტს ჩემთვის არაფერი დაუკლია, პირიქით, მომემატა ენერგია, ენთუზიაზმი, პასუხისმგებლობა და აქტიურ პოლიტიკურ ცხოვრებას გავაგრძელებ. ლევანთან [„ქართული ოცნების“ კანდიდატი საბურთალოს ოლქში ლევან გოგიჩაიშვილი] დავმარცხდი თუ პეტრესთან, მე რომ 2012 წელს ჩამეთვალა, საბურთალოს ოლქში მე გავიმარჯვე და მაგარი ვარ-მეთქი, შესაძლოა, ახლა დამარცხების გამო გული დამწყვეტოდა, თუმცა არც მე გამიმარჯვია მაშინ და არც ლევანს გაუმარჯვია ახლა. გაიმარჯვა იმ რესურსმა და ტალღამ, რაც „ქართულ ოცნებას ორივე არჩევნებისას ჰქონდა“, - აღნიშნა მან.

მისივე შეფასებით, ხალხი „რესპუბლიკელებს“ დღეს, როგორც შორეულ ნათესავს, ისე უყურებს და საჭიროა მათთან დაახლოება.

„წლების განმავლობაში ჩვენს წინააღმდეგ წარმოებულმა კამპანიამ იარლიყები მოგვაკრა, ჩვენი პასუხი კი, რომ ეს სიმართლეს არ შეესაბამება, არასაკმარისია. ივანიშვილიც კი ჩაერთო კამპანიაში, რომ „რესპუბლიკელები“ კულტურულ ღირებულებებს ებრძვიან... ეს გაუგებარი სტერეოტიპები უნდა დავამსხვრიოთ - ხალხი დღეს როგორც შორეულ ნათესავს, ისე გვიყურებს, თუმცა, დიახ, ნაკლები ნარცისიზმითა და ჯანსაღი ამბიციით მათი ახლო ნათესავები უნდა გავხდეთ“, - აცხადებს დავით უსუფაშვილი.