ფინანსთა მინისტრ ნოდარ ხადურის განცხადებით, „ქართული ოცნების“ მთავრობა და გუნდი არის პროდასავლური და ეს აღიარებულია ყველას მიერ დედამიწაზე, ვინც ოდნავ ობიექტურად უყურებს ფაქტორებს.

აღნიშნულით ხადური გამოეხმაურა სამოქალაქო საზოგადოების ნაწილის მოწოდებას პროდასავლურ პარტიებისადმი, რომ მათ არჩევნების მეორე ტურში ოპოზიციის კანდიდატებს დაუჭირონ მხარი.

ფინანსთა მინისტრის თქმით, „ქართული ოცნება“ როგორც პარლამენტში, ასევე მთავრობაში, ღირსეულად გაართმევს მოსახლეობის ნდობას თავს.

ხადურის განმარტებით, სწორედ „ქართული ოცნების“ მმართველობის პერიოდში მოეწერა ხელი ევროკავშირთან ასოცირების ხელშეკრულებას და საქართველოს მთავრობამ ბოლო 4 წლის განმავლობაში გადადგა უპრეცედენტოდ დიდი ნაბიჯები ნატო-სა და ევროკავშირის მიმართულებით.

„ასე, რომ არავის დედამიწის ზურგზე, გარდა იმისა, ვისაც არ უნდა ეს დაინახოს, ეჭვი არ ეპარება, „ქართული ოცნების“პროდასავლურობაში. რაც შეეხება საკონსტიტუციო უმრავლესობას, საქართველოს მოსახლეობა არის ბრძენი, მათ ნდობა უკვე გამოუცხადეს „ქართულ ოცნებას“, მე დარწმუნებული ვარ, რომ „ქართული ოცნება“, როგორც პარლამენტში, ასევე მთავრობაში, ღირსეულად გაართმევს ამ ნდობას თავს“, - განაცხადა ხადურმა.