პარლამენტის თავმჯდომარის, დავით უსუფაშვილის განცხადებით, სამოქალაქო აქტივისტების პათოსი მისთვის გასაგებია, მაგრამ მოწოდება იმის შესახებ, რომ მეორე ტურებში მხარი ოპოზიციის კანდიდატებს დაუჭირონ, პოლიტიკურად შედეგს და პარლამენტში ძალთა ბალანსს მაინც ვერ შეცვლის.

ამის შესახებ უსუფაშვილმა „TV პირველის“ ეთერში განაცხადა.

„მე ძალიან კარგად მესმის სამოქალაქო აქტივისტების იმ ჯგუფის მომართვის პათოსი - მესმის, პატივს ვცემ, ვაფასებ, მაგრამ მინდა მათაც მომისმინონ და გავიაზროთ, თუ რა ვითარებაში ვართ ახლა: - ეს არ არის ცალსახა პროცესი, ეს არის პოლიტიკური პროცესი. ჩვენ ვამბობთ, რომ პარლამენტში საკონსტიტუციო უმრავლესობის ქონა არის ცუდი. ყველა, ვინც თავის დროზე საკონსტიტუციო უმრაველობაში იყო, ეს ძალიან უხაროდა, თუმცა მერე ყველას სანანებელი გაუხდა, იმიტომ რომ ასეთი გზით დაუშვეს მათ შეცდომები. იმის იმედი, რომ თავად „ქართული ოცნება“ ამას მიხვდება და რაიმეს მოიმოქმედებს, მე არა მაქვს, რადგან შეუძლებელია, რომ რამდენიმე კონკრეტულმა დეპუტატმა თქვას, „მოდი, ნუ იქნება საკონსტიტუციო უმრავლესობა, გავდივარ თამაშიდან და ვუთმობ სხვას მანდატს“, - განაცხადა უსუფაშვილმა.

მან ასევე აღნიშნა, რომ თუ მაგალითად, საბურთალოს მაჟორიტარულ საარჩევნო ოლქში ხმას სევდია უგრეხელიძეს მისცემს, ამით პოლიტიკურ შედეგს მაინც ვერ მიაღწევს.

„სამაგიეროდ, ვაღწევ იმ შედეგს, რომ სრულდება ერთი მხრივ, ბატონი ბიძინას და მეორეს მხრივ, ბატონი მიშას ერთობლივი სანუკვარი ოცნება, რომ ეს ქვეყანა ორ ფერში წარმოაჩინონ - „ქართული ოცნება“ და „ნაციონალები” ანუ ჩემი აქტით, რომელიც პოლიტიკურად აბსოლუტურად უშედეგოა, რადგან პოლიტიკურად ვერაფერს ვაღწევ, რომ შეიცვალოს პარლამენტში ძალთა ბალანსი, სამაგიეროდ, მე ამ აქტით ვბარდები „ნაციონალურ მოძრაობას“, როგორც ერთადერთ და განუმეორებელ ოპოზიციურ ძალას, რომელსაც მე მივეცი ხმა. ამის გამო და ამის შემდეგ, ერთი მხრივ, "ნაციონალური მოძრაობა” გვაბურთავებს, ”ქართული ოცნება” ხომ იცოცხლებს და გაიხარებს. დანარჩენი ოთხი წელი უნდა ვიყო იმ დამღით, რომ ”აი ხედავთ, ეს ნაციონალური მოძრაობის” ამომრჩვეველია. ვიქნები კიდეც თუ წავედი და მივეცი ხმა ამ უაზრო ვითარებაში”, - განაცხადა უსუფაშვილმა.