,,დემოკრატიული მოძრაობის“ ლიდერის განცხადებით, „ქართული ოცნება“ და „ნაციონალური მოძრაობა“ გარიგებულები არიან. ამის შესახებ ნინო ბურჯანაძემ „მაესტროს“ ეთერში განაცხადა.

მისივე თქმით, 8 ოქტომბრის არჩევნების შემდეგ, საქართველოში პოლიტიკური სურათი ძალიან მძიმეა. როგორც ბურჯანაძემ აღნიშნა, ეს არ არის პესიმიზმი ეს არის რეალისტური ხედვა, იმ გამოცდილებიდან გამომდინარე, რომელიც მას გააჩნია.

,,იძულებული ვარ საზოგადოებას გავახსენო, რამდენჯერ ისროლეს ქვები ჩემი მიმართულებით იმის გამო, რასაც ვამბობდი და რაც საზოგადოებას არ მოსწონდა, ოღონდ მერე, ჩემი პროგნოზები ყოველთვის მართლდებოდა“, - განაცხადა ბურჯანაძემ.

მან აღნიშნა, რომ ,,დემოკრატიული მოძრაობა“ კატეგორიულად გამორიცხავს რაიმე ტიპის თანამშრომლობას ,,ნაციონალურ მოძრაობასთან“ და რომ საკონსტიტუციო უმრავლესობისათვის ხმის არ მიცემა, სულაც არ ნიშნავს იმას, რომ „ნაციონალებს“ დაუჭიროს მხარი.

,,ჩვენ გვქონდა მესამე - ალტერნატიული გზა, რომელიც არის ყველაზე სამართლიანი გზა. ლაპარაკია ჩვენს მოთხოვნებზე - სამასამდე საჩივარზე, რომელიც გვაძლევდა იმის საშუალებას, რომ გადათვლილიყო უბნებზე ხმები. დარწმუნებული ვარ, რომ ეს, გვაძლევდა იმის საშუალებას, რომ მომხდარიყო არჩევნების შედეგების კორექტირება. ჩვენ ნამდვილად გადავლახავთ ბარიერს თუ უბნები გაიხსნება. ასეთ შემთხვევაში, ვერც „ნაციონალებს“ ექნებათ გადალახული ბარიერი და ვერც „ოცნება“ ვერ მიიღებდა საკონსტიტუციო უმრავლესობას. ზუსტად ამიტომ იცავს ხელისუფლება ყველა ოქმს კბილებით, რომ არავითარ შემთხვევაში არ გაიხსნას უბნები“, - განაცხადა ნინო ბურჯანაძემ.

,,ნინო ბურჯანაძე-დემოკრატიული მოძრაობის“ ლიდერმა ასევე თქვა, რომ ავტოკრატია მოდის საქართველოში, ოღონდ ამას, საზოგადოების ის ნაწილი, რომელიც ოცნებაშია გართული, ძალიან გვიან მიხვდება, როცა ქვეყანაში ძალიან მძიმე პროცესები განვითარდება და როცა ამის გამოსწორება უკვე ძალიან ძნელი იქნება.