ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრ სოზარ სუბარის განცხადებით, საკონსტიტუციო უმრავლესობის წინააღმდეგ კამპანიის ყველა მონაწილე „ნაციონალური მოძრაობის“ მხარდამჭერია.

აღნიშნულით სუბარი პროდასავლური პარტიებისადმი სამოქალაქო საზოგადოების ნაწილის მოწოდებას ეხმაურება.

„ყველა ის ადამიანი, ვინც ამ კამპანიაში მონაწილეობს, ძალიან მარტივად არის „ნაციონალური მოძრაობის“ მხარდამჭერი. მათ კამპანიას რეალურად ჰქვია მხარი დავუჭიროთ „ნაციონალურ მოძრაობას“, მხარი დავუჭიროთ მიხეილ სააკაშვილს, მხარი დავუჭიროთ ადამიანების წამებას, კერძო საკუთრების შელახვას და იმ ყველა საშინელებას, რაც ხდებოდა 9 წლის განმავლობაში. თვითონ სათაურიც და მიმართვის ადრესატებიც ძალიან სასაცილოა, იმიტომ რომ, ლაპარაკობენ პროდასავლურ ძალებზე და ჩამონათვალში არის „ლეიბორისტული პარტია“, რომელიც არც დასავლეთია, არც აღმოსავლეთი, არც სამხრეთი და არც ჩრდილოეთი“,-აცხადებს სუბარი.

დევნილთა მინისტრმა ასევე აღნიშნა, რომ დასავლეთთან „ნაციონალურ მოძრაობას“ კავშირი არა აქვს.

„ეს არის ხმა წარსულიდან და მეტი არაფერი; ან მიმართავენ ბურჭულაძეს, რომელიც კრემლიდან ნებისმიერ დასტვენაზე მიქრის, იქ კონცერტებს აწყობს და უმღერის დითირამბებს ან „ნაციონალური მოძრაობა“, რომლის დასავლეთში, მე არ ვიცი, რა იგულისხმება. დასავლეთში იყო ჰიტლერი, რომელიც ატარებდა იმ პოლიტიკას, რასაც ისინი ატარებდნენ, სხვა დასავლეთთან „ნაციონალურ მოძრაობას“ კავშირი არა აქვს. შესაბამისად, თუ ვლაპარაკობთ დასავლეთზე და ღირებულებებზე, ეს არის ადამიანის უფლებების პატივისცემა, ევროპული და ევროატლანტიკურ ინტეგრაცია და ზოგადად, ის გეზი, რომელსაც „ქართული ოცნება“ მიჰყვება“,-თქვა მან.

სამოქალაქო საზოგადოების ნაწილი მიმართვას ავრცელებს, რომლითაც პროდასავლურ პოლიტიკურ პარტიებს არჩევნების მეორე ტურში ოპოზიციის კანდიდატების მხარდაჭერისკენ მოუწოდებს. გავრცელებულ მიმართვაში აღნიშნულია, რომ არსებობს საშიშროება ქვეყანაში ერთპარტიული მმართველობა დამკვიდრდეს, ამის თავიდან ასაცილებლად კი მათ მხარი უნდა დაუჭირონ ოპოზიციას.