საქართველოს მთავრობამ დღევანდელ სხდომაზე „საფეხმავლო ბილიკების გეგმარებისა და მონიშვნის შესახებ“ ტექნიკური რეგლამენტი დაამტკიცა.

ეკონომიკისა და მდგრადი განვითარების სამინისტროს ცნობით, რეგლამენტი ეფუძნება და ითვალისწინებს სალაშქრო ტურიზმის სფეროში მოწინავე ქვეყნების - შვეიცარიის, საფრანგეთისა და პოლონეთის გამოცდილებასა და სტანდარტებს.

უწყების ინფორმაციით, რეგლამენტი ასევე შეესაბამება ევროპის სალაშქრო ფედერაციის მიერ დადგენილ, საფეხმავლო ბილიკების მონიშვნის ზოგად საფუძვლებს.

„საქართველოსადმი სულ უფრო მზარდი ტურისტული ინტერესის გამო, ძალიან მნიშვნელოვანია, რომ ქვეყნის მთელ ტერიტორიაზე სხვადასხვა ტიპის საფეხმავლო მარშრუტების დაპროექტება და მონიშვნა მოხდეს გეგმაზომიერად, საერთაშორისო გამოცდილებისა და სტანდარტების გათვალისწინებით, რათა განვითარდეს ლაშქრობის კულტურა და შეიქმნას საფეხმავლო მარშრუტების ერთიანი ქსელი“,-ნათქვამია ეკონომიკის სამინისტროს მიერ გავრცელებულ ინფორმაციაში.