„ლეიბორისტული პარტიის“ ლიდერი შალვა ნათელაშვილი ოპოზიციას მეორე ტურებისა და პარლამენტში შესვლაზე ბოიკოტის გამოცხადებისკენ მოუწოდებს. ნათელაშვილი მიიჩნევს, რომ ამ გზით ოპოზიციას შეუძლია ახალი არჩევნების ჩატარების გადაწყვეტილება მიაღებინოს ხელისუფლებას.

ამის შესახებ ნათელაშვილმა „რუსთავი 2“-ის ეთერში ისაუბრა.

„როგორც კი გაყალბებით, მოსყიდვით, ძალადობით და რეპრესიებით პარლამენტში გასული „ოცნება“ დარჩება მარტო თავის პულტებთან, მას არ ექნება არანაირი ლეგიტიმურობა მსოფლიოს თვალში და იძულებული იქნება თავიდან ჩაატაროს არჩევნები. თუ „ნაციონალური მოძრაობა“ არ შევა პარლამენტში, ამ პარლამენტს უწერია მოკლე დღე და მაქსიმუმ გაზაფხულზე ჩვენ მივიღებთ ახალ საპარლამენტო არჩევნებს“, - განაცხადა მან.

შალვა ნათელაშვილი ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის, სოზარ სუბარის განცხადებასაც გამოეხმაურა, რომლის მიხედვითაც მან „ლეიბორისტულ პარტიას“ „ხმა წარსულიდან“ უწოდა.

„ლეიბორისტული პარტიის“ ლიდერის თქმით, სჯობს იყო ხმა წარსულიდან - ზნეობრივი და ეროვნული, ვიდრე იყო „ივანიშვილის საინფორმაციო ღრუ და  მევალე“.

„ჩვენი ლანდი არ ასვენებთ და მთავრობის სხდომებსაც ჩვენ გვიძღვნიან. სჯობს იყო ხმა წარსულიდან - ზნეობრივი და ეროვნული, ვიდრე იყო ხმა დღევანდელობიდან, მაგრამ იყო ივანიშვილის საინფორმაციო ღრუ და ივანიშვილის მევალე“, -აღნიშნა მან.