„ნაციონალური მოძრაობის“ ერთ-ერთი წევრი გიორგი კანდელაკი მიიჩნევს, რომ საეჭვოა, „ქართული ოცნების“ მიერ საკონსტიტუციო უმრავლესობის მოპოვების შემთხვევაში, განსხვავებული აზრის გათვალისწინება მოხდეს.

გიორგი კანდელაკი საკონსტიტუციო ჯგუფში ჩართვის აზრს ამ ეტაპზე ვერ ხედავს.

„როდის უკითხავს ბიძინა ივანიშვილს საზოგადოებისთვის აზრი, ახლა რომ ჰკითხოს. ერთადერთი შემთხვევა, როდესაც ამგვარი კომისიის არსებობას აზრი ექნება, მაშინ თუ „ქართული ოცნება“ ვერ მოიპოვებს საკონსტიტუციო უმრავლესობას პარლამენტში და აუცილებელი გახდება კონსენსუსი ოპოზიციასთან ნებისმიერი ცვლილებისათვის“, - განაცხადა გიორგი კანდელაკმა.

პრემიერ მინისტრ გიორგი კვირიკაშვილის განცხადებით, „ხელისუფლებამ მემკვიდრეობით მიიღო ძალიან დაუბალანსებელი კონსტიტუცია და აუცილებლად შესაქმნელია ჯგუფი, რომელიც, საზოგადოების თითოეული წევრის ძალიან ფართო ჩართულობით, მოახდენს ისეთ ცვლილებებს, რომ მომავალში ვერავინ ვეღარასოდეს მოახდინოს ხელისუფლების უზურპირება და ის, ერთხელ და სამუდამოდ იყოს ევროპული, დემოკრატიული საქართველოს კონსტიტუცია“.