საკონსტიტუციო სასამართლოს თავმჯდომარედ პლენუმმა ზაზა თავაძე აირჩია. მას პლენუმის 8 წევრიდან მხარი 5-მა დაუჭირა.

პლენუმის სხდომა დახურული იყო, ამიტომ უცნობია ვინ დაუჭირა მხარი თავაძის კანდიდატურას.

თავაძეს საკონსტიტუციო სასამართლოს მოსამართლის უფლებამოსილების გასვლამდე 3 წელი და 7 თვე აქვს დარჩენილი, სწორედ ამ დროით იქნებს ის საკონსტიტუციო სასამართლოს თავმჯდომარე. 

რაც შეეხება ირინა იმერლიშვილს, რომელიც საკონსტიტუციო სასამართლოს თავმჯდომარის თანამდებობაზე ზაზა თავაძის კონკურენტი იყო, მან, შესაბამისად, დანარჩენი 3 ხმა მიიღო.

ზაზა თავაძე 1975 წლის 9 თებერვალს ზესტაფონში დაიბადა. დაამთავრა საქართველოს ღია ჰუმანიტარული ინსტიტუტი სამართალმცოდნეობის სპეციალობით და მიენიჭა იურისტის კვალიფიკაცია (1996).  სწავლობდა ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის  გერმანულენოვან მაგისტრატურაში(2001-2002).  ზაზა თავაძე 2010 წლის 30 მარტს საკონსტიტუციო სასამართლოს წევრად დაინიშნა. პლენუმის მიერ პირველად 2010 წლის 15 ივნისს, მეორედ კი 2015 წლის 10 ივნისს არჩეულ იქნა საქართველოს საკონსტიტუციო სასამართლოს თავმჯდომარის მოადგილედ და მეორე კოლეგიის თავმჯდომარედ. 2008-2010 წლებში ზაზა თავაძე იყო საქართველოს იუსტიციის მინისტრის მოადგილე. 2007 წლის მარტიდან 2008 წლის თებერვლამდე საქართველოს გენერალური პროკურატურის საკადრო უზრუნველყოფის დეპარტამენტის უფროსის თანამდებობას იკავებდა. 2004 წელს კი საქართველოს ლტოლვილთა და განსახლების სამინისტროს იურიდიული დეპარტამენტის უფროსად მუშაობდა.

საკონსტიტუციო სასამართლოს ყოფილ თავმჯდომარეს, გიორგი პაპუაშვილს უფლებამოსილების ვადა მიმდინარე წლის 30 სექტემბერს ამოეწურა.