"მე აქედან საქართველოში დავრუნდები უფრო იმედიანი, ვინაიდან ჩვენი პრობლემები ძალიან კარგად ესმით აქ", განაცხადა დავით უსუფაშვილმა სენატორ, ტომ კოტონთან და სენატის შიდა უსაფრთხოებისა და მთავრობის საქმეთა კომიტეტის თავმჯდომარესთან, სენატორ, რონ ჯონსონთან გამართული შეხვედრების შემდეგ.

შეხვედრებზე მხარეებმა ისაუბრეს ორ ქვეყანას შორის არსებულ ურთიერთობებზე და სამომავლო პერსპექტივებზე, საქართველოში და უკრაინაში მიმდინარე მოვლენებზე, ეკონომიკურ თანამშრომლობასა და დემოკრატიული ინსტიტუტების განვითარებაზე.

პარლამენტის თავმჯდომარემ შეხვედრების დასრულების შემდეგ ჟურნალისტებთან განაცხადა: „ჩვენ საქართველოს საქმეებზე ვსაუბრობთ ყველასთან. სენატორ რონ ჯონსონთანაც საქართველოზე და უკრაინაზე ვსაუბროდით. ის მოსმენა, რომელიც ამ წუთებში დამთავრდა, სწორედ ბატონ ჯონსონს მიჰყვდა და ჩვენ გავაგრძელეთ საუბარი რეგიონში შექმნილ ვითარებაზე. მივიღეთ ძალიან მკაფიო გზავნილი იმის თაობაზე, რომ იგი პირადად ყველაფერს გააკეთებს, რათა აშშ-ი იყოს საქართველოს გვერდით ყველა თვალსაზრისით, როდესაც ჩვენ გვჭირდება ჩვენი მეგობრების გვერდში ყოფნა. ასევე, ძალიან საინტერესო საუბარი გვქონდა იმის თაობაზე, თუ რა ტაქტიკა და რა სტარატეგია იქნება სწორი იმისთვის, რომ უკრაინაში, საქართველოში მოვლენები განვითარდეს უკეთესი მიმართულებით და არა უარესი მიმართულებით.

ჩვენ ვისაუბრეთ ევროპელ კოლეგებთან ძალიან მჭიდრო ურთიერთობების აუცილებლობაზე. მიუხედავად იმისა, რომ ცალკეულ საკითხებში გარკვეული აზრთა სხვადსხვაობა შეინიშნება, უნდა იქნეს მიღწეული კონსენსუსი და სოლიდარობა ევროპელი მეგობრების და ამერიკელი მეგობრების, ეს არის ძალიან მნიშვნელოვანი. პუტინს არ უნდა მიეცეს საშუალება, რომ რაიმე აზრთა სხვადასხვაობა გადაწყვეტილებების სხვადასხვაობაში გადაიზარდოს. მე აქედან საქართველოში დავრუნდები უფრო იმედიანი, ვინაიდან ჩვენი პრობლემები ძალიან კარგად ესმით აქ," თქვა უსუფაშვილმა.