„თბილისიმარათონთან“ დაკავშირებით, დღეს, საზოგადოებრივი წესრიგისა და უსაფრთხოების დაცვის მიზნით, დილის 05:00 საათიდან 14:00 საათამდე დედაქალაქის გარკვეულ უბნებში ავტოტრანსპორტის მოძრაობა აკრძალულია.

საქველმოქმედო გარბენმა სტარტი დილის 10:00 საათზე, რუსთაველის გამზირზე, პირველი კლასიკური გიმნაზიის მიმდებარე ტერიტორიიდან აიღო. მარათონი დედაქალაქის ცენტრალურ ქუჩებში ორ წრედ ტარდება.

შსს-ს საპატრულო პოლიციის დეპარტამენტის ცნობით, აღნიშნულ ღონისძიებასთან დაკავშირებით გადაიკეტა კრწანისის მოედანი - ავტომანქანების ნაკადი მოძრაობს ორთაჭალჰესის მიმართულებით, მარცხენა სანაპიროზე;

მოძრაობა აიკრძალა თბილისის საკონცერტო დარბაზის (ფილარმონიის) მიმდებარე ტერიტორიაზე, რუსთაველის გამზირის მიმართულებით. ავტომანქანები მოძრაობენ პეტრე მელიქიშვილის ქუჩიდან, მერაბ კოსტავას ქუჩაზე, გმირთა მოედნის მიმართულებით;

გადაიკეტა თამარ მეფისა და დავით აღმაშენებლის გამზირების კვეთა, მეტროსადგურ „მარჯანიშვილის“ მიმართულებით, ასევე, მიხეილ წინამძღვრიშვილის, დავით აღმაშენებლის და მიმდებარე ქუჩები;

მოძრაობა აიკრძალა თავისუფლების მოედანზე, პუშკინის ქუჩის დასაწყისში, რუსთაველის გამზირსა და ყველა მიმდებარე ქუჩაზე.

მარათონის მიმდინარეობის დროს მძღოლები შემდეგი მარშრუტებით სარგებლობენ:

სოლოლაკიდან გადაადგილება ხდება ლადო ასათიანის, ოვანეს თუმანიანის და გორგასლის ქუჩების გავლით, საიდანაც ავტომანქანები ჩადიან გორგასლის მოედანზე და მოძრაობას აგრძელებენ ჯებირებით გაყოფილ გორგასლის ქუჩაზე, კრწანისის მოედნის მიმართულებით;

ვაკე-საბურთალოს მიმართულებით მოძრავი ავტომანქანები გზას დანიელ ჭონქაძის ქუჩით აგრძელებენ;

ალექსანდრე გრიბოედოვის ქუჩიდან ჩამოსული ავტომანქანების ნაკადი ჯებირებით გაყოფილ რუსთაველის გამზირზე მოძრაობას ფილარმონიის მიმართულებით აგრძელებს;

ბარათაშვილის ქუჩაზე მოძრავი ავტომანქანების ნაკადი მოძრაობს რეზო თაბუკაშვილის ქუჩაზე და მოძრაობას აგრძელებს სასტუმრო „რედისონისკენ“, ვარდების რევოლუციის სახელობის მოედნის გავლით, სასურველი მიმართულებით;

უშანგი ჩხეიძის ქუჩიდან გამოსული ნაკადი მოძრაობს ჯებირებით გაყოფილ გალაქტიონის ხიდზე, საიდანაც სვლას აგრძელებს მარჯვენა სანაპიროზე, "ლაგუნა ვერეს" მიმართულებით;

ზვიად გამსახურდიას სახელობის სანაპირო იუსტიციის სახლთან ჯებირებით გაიყო და ავტომანქანები მოძრაობენ ბარათაშვლის ქუჩის მიმართულებით.