„ქართული ოცნების“ ერთ-ერთი წევრის, მამუკა მდინარაძის განცხადებით, „ნაციონალური მოძრაობის“ კანდიდატმა გაუსწრო „ქართული ოცნების“ კანდიდატს, თუმცა მისი თქმით, არჩევნების მეორე ტურში თამაზ ნავერიანი მიაღწევს გამარჯვებას.

მდინარაძის განმარტებით, მარნეულის რაიონის სოფელ ყიზილაჯლოს 48-ე უბნის მონაცემები არჩევნების საბოლოო შედეგებზე გავლენას ვერ მოახდენს.

მან ასევე აღნიშნა, რომ „ნაციონალური მოძრაობის“ მიერ გუშინ გაკეთებული განცხადებები, თითქოს 8 ოქტომბრის შემდგომ განვითარებულმა მოვლენებმა და მომხდარმა დაპირისპირებამ მოახდინა გავლენა ამომრჩევლებზე, სრული სიცრუეა.

„არაფერ შუაში არაა ის ამბავი, რაც იყო 8 ოქტომბერს. ეს იყო მიზანმიმართული პროვოკაცია. დამნაშავეები პასუხისგებაში არიან მიცემული და სასამართლო გადაწყვეტს მათ ბედს. ეს ამბავი ხმების მიცემასთან და ნების გამოხატვასთან არაფერ შუაში არ არის“, - განაცხადა მდინარაძემ.

გუშინ მარნეულისა და ზუგდიდის ოთხ საარჩევნო უბანზე განმეორებითი კენჭისყრა გაიმართა.

განმეორებითი კენჭისყრის წინასწარი მონაცემების გათვალისწინებით, მარნეულისა და ზუგდიდის მაჟორიტარულ საარჩევნო ოლქებში არჩევნების მეორე ტური გაიმართება.

როგორც ცესკო-ს სპიკერმა, ანა მიქელაძემ საინფორმაციო ბრიფინგზე განაცხადა, განმეორებითი კენჭისყრის შემაჯამებელი ოქმის გათვალისწინებით, წინასწარი მონაცემების მიხედვით, მარნეულის ოლქში საუკეთესო შედეგის მქონე ორი კანდიდატია - აჰმედ იმამყულიევი ("ნაციონალური მოძრაობა") 10 026 ხმით, რაც ხმების საერთო რაოდენობის 48,11%-ს შეადგენს და თამაზ ნავერიანი ("ქართული ოცნება") 9051 ხმით, რაც საერთო რაოდენობის 43.43%-ია.

რაც შეეხება ზუგდიდს, სამივე საარჩევნო უბნის განმეორებითი კენჭისყრის შემაჯამებელი ოქმის გათვალისწინებით, წინასწარი მონაცემების მიხედვით, 66-ე ზუგდიდის მაჟორიტარულ ოლქში საუკეთესო შედეგის მქონე კანდიდატები არიან სანდრა რულოვსი ("ნაციონალური მოძრაობა") 10 692 ხმით, რაც საერთო რაოდენობის 44.8%-ია და ედიშერ თოლორაია ("ქართული ოცნება") 11 607 ხმით, რაც ხმების 48.63%-ს შეადგენს.