სამხედრო ექსპერტმა ირაკლი ალადაშვილმა „პალიტრანიუსის" გადაცემაში „360 გრადუსი" სტუმრად მყოფ თავდაცვის ყოფილ მინისტრს, დიმიტრი შაშკინს მისი მინისტრობის დროს მომხდარი შემთხვევები შეახსენა.

„თქვენი დანიშვნიდან რამდენიმე დღეში, 13 ივლისს, გარდაიცვალა რიგითი კობა მახარაშვილი. ცოტა ხანში, 21 აგვისტოს, გარდაიცვალა რიგითი ჯაბა გაბიტაშვილი. ორივე შემთხვევაში ეს მოხდა გასროლის შედეგად. მე მაშინ, როგორც ჟურნალისტი, ბევრი ვეცადე რაიმე პასუხი გამეგო, მაგრამ სამინისტროდან ვერაფერი ინფორმაცია ვერ მივიღე“, - ამ სიტყვებით უპასუხა სამხედრო ექსპერტმა, ირაკლი ალადაშვილმა გადაცემაში „360 გრადუსი“ სატელეფონო ჩართვით თავდაცვის ყოფილი მინისტრის, დიმიტრი შაშკინის კრიტიკას თავდაცვის უწყების მიმართ.

როგორც გადაცემაში საუბრისას დიმიტრი შაშკინმა განაცხადა, „კრწანისის“ სამხედრო ბაზაზე მომხდარი ინციდენტს თავდაცვის სამინისტროს მაღალჩინოსნების პასუხისმგებლობა უნდა მოჰყვეს.

„სხვისი კრიტიკა ადვილია, მაგრამ თქვენს დროსაც იყო ბევრი ისეთი ამბავი, რასაც პასუხი სჭირდებოდა. თქვენ ამბობთ, რომ გარდაცვლილის ძმა ჯარში მსახურობს და ეს გამოიყენა ხელისუფლებამ. მგონი ოფიციალურად იყო გაცხადებული, რომ მისი ძმა ჯერ კიდევ 15 სექტემბერს იქნა დათხოვნილი შეიარაღებული ძალებიდან. ასე რომ, მისი ძმა არ მსახურობს დღეს და ამას ვერ გამოიყენებდა ხელისუფლება ზეწოლისთვის“ - განაცხადა ირაკლი ალადაშვილმა გადაცემაში.

„360 გრადუსში“ საუბრისას სამხედრო ექსპერტმა იმედი გამოთქვა, რომ ნელ-ნელა სიმართლე გაირკვევა.

„დღეს მამაც რწმუნდება, რომ იქ ცოტა სხვა ვითარება იყო. მე თავიდანვე ვაცხადებდი, რომ საჭიროა გამოძიებას დაველოდოთ. ახლა ეს სურათი მეტნაკლებად გამოიკვეთა, ის შეიძლება ძნელად მისაღები იყოს ამ ოჯახისთვის“, - განაცხადა ირაკლი ალადაშვილმა „პალიტრანიუსის“ ეთერში.