საქართველოს თავდაცვის ყოფილი მინისტრი თინა ხიდაშელი "კრწანისის" სასწავლო ცენტრის ტერიტორიაზე მომხდარ ინციდენტს ეხმაურება.

როგორც "რუსთავი 2"-თან საუბრისას ხიდაშელმა განაცხადა, მისი ვარაუდით, მომხდარი ჩვეულებრივი სტანდარტული კრმინალური მდგომარეობაა და არა უსაფრთხოების წინააღმდეგ განხორციელებული თავდასხმა.

ხიდაშელი აღნიშნულ საკითხზე მოქმედი თავდაცვის მინისტრის, ლევან იზორიასა და პრემიერ მინისტრის, გიორგი კვირიკაშვილის მიერ გაკეთებულ განცხადებებსაც გამოეხმაურა.

"მე შორსმიმავალ დასკვნებს არ გავაკეთებ, ნამდვილად არ მინდა დავემსგავსო დღევანდელ თავდაცვის მინისტრს, რომელმაც მეორე დილასვე რეცეპტი გამოწერა, დასკვნაც დაწერა, კი იძახდა გამოძიება მიმდინარეობსო, მაგრამ აბსოლუტურად ყველაფერი დეტალურად მოგვიყვა, თითქოს იქ იმყოფებოდა ადგილზე და თავის თვალით ჰქონდა ნანახი....

სამწუხაროდ, ის რაც დღემდე მოვისმინეთ იმდენად შეუსაბამოა და ურთიერთგამომრიცხავი, ძალიან რთულია გაჰყვე ამ ვერსიას. ამას კიდევ უფრო მეტად ამძაფრებს ის განცხადებაც, რომელიც პრემიერისგან მოვისმინეთ. ჩემთვის საერთოდ წარმოუდგენელი იყო, როდესაც პრემიერ მინისტრი გვეუბნება მთელ ქვეყანას, რომ ყველაფერი გაარკვია, კითხვები არ აქვს, და კითხვებს აღარ მიიღებს, გამომრჩა ის მომენტი, როცა პრემიერისგან უნდა ვითხოვოთ ნებართვა კითხვები დავსვათ და არ დავსვათ ამა თუ იმ საკითხზე.

მაშინ რისთვის ატარებენ გამოძიებას, თუ ყველამ ყველაფერი იცის, რატომ ატარებენ გამოძიებას? გამოვიდნენ მაშინ და მოგიყვნენ, დააკავონ ადამიანები პასუხისმგებელნი, საბრალდებო დასკვნა გააცნონ საზოგადოებას და წაიღონ საქმე სასამართლოში. ასე არა შეიძლება საუბარი, როდესაც ადამიანის სიცოცხლეს ეხება ერთის მხრივ საქმე და მეორე მხრივ არანაკლებ ღირებულებას - ქვეყნის თავდაცვის უნარიანობას.... ვისურვებდი, რომ ამ ქვეყანში არასოდეს იყვნენ ხელისუფლებაში ხალხი, როდესაც  2 საათში დეტალურად მოგვიყვებიან ამბავს, შეეცდებიან საზოგადოებას მიასაღონ საკუთარი ვერსია, დღეები რომ გადის, იმ ვერსიაში თავადვე შეიტანონ ცვლილებები", - განაცხადა თინა ხიდაშელმა და დასძინა, რომ თუ თავდაცვის სამინისტროს დაფინანსება არ გაიზარდა, შესაძლოა, უფრო მძიმე ვითარებაც შეიქმნას.