სამტრედიაში გარდაცვლილი დემურ სტურუას ბიცოლა დარიკო ჯაში დარწმუნებულია, რომ მისმა რძალმა, გარდაცვლილის დედამ, ნონა ჯოჯუამ პოზიციის შეცვლაში ფული აიღო.

"სად გაექცევა ექსპერტიზის პასუხს, სადაც ყველაფერი არის აღნიშნული. არ ვიცი რა დაემართა ჩემს რძალს. ის, რასაც 3 თვეა ვამტკიცებდით, ერთ დღეში რატომ გადაიფიქრა. დარწმუნებული ვარ, ჩემმა რძალმა პოზიციის შეცვლის სანაცვლოდ ფული აიღო", - აცხადებს დარიკო ჯაში.

ნონა ჯოჯუამ ჟურნალისტებთან საუბრისას განაცხადა, რომ წერილი, რომელიც სტურუამ თვითმკვლელობამდე დატოვა, შესაძლოა, სხვამ დააწერინა.


"წერილი ნამდვილად არის ჩემი შვილის ხელით დაწერილი, მაგრამ, როგორც ასეთი, წინა მხარეს არამგონია, რომ ჩემი შვილის აზრით იყოს დაწერილი, რადგან ეს წერილი დააწერინეს. წინა მხარეს არეულად წერია, მეორე მხარეს - დალაგებულად. განგებ დაადანაშაულა ვიღაცამ გოდერძი თევზაძე. არანაირი ინტერესი არ მაქვს, რომ გოდერძი თევზაძე მკვლელია", - განაცხადა დემურ სტურუას დედამ.

ნონა ჯოჯუა იხსენებს, რომ თევზაძე აღნიშნულ შემთხვევამდე, როდესაც ის უბნის რწმუნებული იყო, არაერთხელ დაეხმარა მის ოჯახს.


"როდესაც გოდერძი უბნის რწმუნებული იყო, ბევრჯერ დამიდგა გვერდით. არცერთი პოლიციელი არ დამხმარებია.... გამოძიებაც დაიწყო, მაგრამ სად არის გამოძიება, რას აკეთებს ამდენი ხანი, თუ ის მკვლელი არ არის, ნამდვილი მკვლელი რომ გარეთ დადის. ვფიქრობ, შეიძლება არ არის გოდერძი ნამდვილი მკვლელი და გარეთ არის ის ნამდვილი მკვლელი. შეიძლება, ის არის, რომ მაშინებს. ისიც მაინტერესებს, სადაა გამოძიება, რომ ჩემს შვილს ტელეფონის მოპარვას აბრალებდნენ. რომელიც ის ტელეფონი სხვა ბიჭმა მიიტანა ლომბარდში, ეს რატომ არ არის გამოძიებული. იმ ზომაზე ვარ უკვე, რომ არავის ვენდობი, რადგან ყველა გაიფანტა, ყველა წავიდა და დამტოვა. გაურკვევლობაში ვარ, მე მაინტერესებს ნამდვილი მკვლელი", - განაცხადა ნონა ჯოჯუამ.