ცენტრალური საარჩევნო კომისია მთაწმინდის მე-18 საარჩევნო უბანზე 29 ოქტომბერს მოხდარ ინციდენტზე საუბრობს.

"დაახლოებით, საღამოს 07:20 სთ-ზე, სამი პირი მივიდა მთაწმინდის #18-ე უბანზე, მათ დაცვის პოლიციას თავი წარუდგინეს როგორც საარჩევნო ოლქის წარმომადგენლებმა. ეს პირები უბანზე შევიდნენ, როდესაც უბანი იყო უკვე დაკეტილი მასალებთან ერთად და მათ დაიწყეს საარჩევნო მასალების დათვალიერება, გადაღება, უჯრების გახსნა, სადაც მასალა ინახებოდა, მათ შორის ცესკოს ინფორმაციით გადაიღეს სამაგიდო სიებიც, რომელიც შეიცავს ამომრჩევლის პერსონალურ მონაცემებს, პირად ნომრებს.

მოგვიანებით დადგინდა, რომ აღნიშნული პირები არ იყვნენ ოლქის წარმომადგენლები, მათ ჰქონდათ დამკვირვებლის და პარტიის წარმომადგენლობის სააკრედიტაციო მოწმობები.

დაცვის პოლიციამ მათ დაატოვებინა უბანი. ადგილზე მასალების გადასამოწმებლად მივიდნენ ოლქისა და ცესკოს წარმომადგენლები, ასევე უბნის თავმჯდომარე; შეტყობინება შევიდა 112-ზე და გამოძახებული იყო პოლიცია. აღნიშნულ ფაქტზე დაწყებულია გამოძიება.

მიუხედავად იმისა, რომ საარჩევნო მასალა და დოკუმენტაცია არის უბანზე სრულყოფილი და დაუზიანებელი, აღნიშნული წარმოადგენს დაკეტილ საარჩევნო უბანზე მოტყუებით შესვლას და უფლებამოსილების გადამეტებას.

შესაბამისად, მივმართავთ დამკვირვებლებს, საარჩევნო უბანზე ყოფნის უფლების მქონე პირებს იმოქმედონ კანონის ფარგლებში, არ გასცდნენ საკუთარი უფლებამოსილების ფარგლებს და ხელი შეუწყონ საარჩევნო ადმინისტრაციას საქმიანობის განხორციელებაში", - განაცხადა ცესკოს- სპიკერმა, ანა მიქელაძემ საინფორმაციო ბრიფინგზე.