საერთო ჯამში საოლქო საარჩევნო კომისიებში 47 საჩივარი შევიდა, - განაცხადა ცენტრალური საარჩევნო კომისიის სპიკერმა, ანა მიქელაძემ საინფორმაციო ბრიფინგზე. 

მისივე განმარტებით, საჩივართა უმეტესობა პროცედურულ ხარვეზებს ეხება.

"ისნის მაჟორიტარული საარჩვენო ოლქის 2 უბანზე კიდევ ერთხელ აღიკვეთა 2 დამკვირვებლის მხრიდან ყალბი აკრედიტაციის მოწმობების გამოყენების მცდელობა. შეგახსენებთ, რომ ამავე მაჟორიტარულ ოლქში, მსგავსი ფაქტები გამოვლინდა №49-ე და №66-ე უბნებზე.

მცხეთის მაჟორიტარულ საარჩევნო ოლქში საკრებულოს 1 წევრი და გამგებლის მოადგილე ცდილობდნენ დაკვირვებოდნენ არჩევნებს სადამკვირვებლო ორგანიზაციის ეგიდით. აღნიშნული პიროვნებების მონაცემები გადაამოწმა საარჩევნო ადმინისტრაციამ და მათ გაუუქმდათ დამკვირვებლის სტატუსი.

მარკირებული ამომრჩევლების მასობრივი მისვლა დაფიქსირდა მთაწმინდის მაჟორიტარულ საარჩევნო ოლქში. აღნიშნულმა პირებმა განაცხადეს, რომ მათ 8 ოქტომბრის არჩევნების შემდეგ დარჩათ მარკირება, რაც პრაქტიკულად გამორიცხულია. მსგავსი თითო ფაქტი დაფიქსირდა ისნისა და ფოთის მაჟორიტარული საარჩვენო ოლქების თითო უბანზე, სადაც ამომრჩევლებს, მას შემდეგ რაც დაუდგინდათ მარკირების პროცედურის გავლა, არც ერთმა ზემოაღნიშნულმა კომისიამ, კანონის შესაბამისად, არ მისცა ხმის მიცემის განხორციელების შესაძლებლობა. მთაწმინდის ფაქტთან დაკავშირებით ნაციონალურმა მოძრაობამ დაწერა საჩივარი.

ბათუმის №70 მაჟორიტარული ოლქის №76 უბანზე 11.10 საათზე უბანზე მისულმა ამომრჩეველმა შევსებული საარჩევნო ბიულეტენი ძირითადი ყუთის ნაცვლად მოათავსა გადასატან საარჩევნო ყუთში. აღშნიშნული ფაქტის შემდეგ გადასატანი ყუთი დაილუქა.

ხელვაჩაურის №72 მაჟორიტარული ოლქის №10 უბანზე იმყოფებოდა პარტია ქართული ოცნების ორი წარმომადგენელი ერთდროულად. საუბნო კომისიის თავმჯდომარემ ერთ-ერთ მათგანს უბანი დაატოვებინა.

ჩხოროწყუს მუნიციპალიტეტში მცირე ხნით გამოირთო ელექტროენერგია. აღნიშნული პრობლემა რამდენიმე წუთში აღმოიფხვრა და მას კენჭისყრის პროცესის მიმდინარეობისთვის ხელი არ შეუშლია, - განაცხადა ანა მიქელაძემ.