„ქართულმა ოცნებამ“ ყველაფერი გააკეთა იმისთვის, რომ მოსახლეობა გაეცურებინა და ეს გამოუვიდა კიდეც საზოგადოების იმ ნაწილთან, რომელმაც გულუბრყვილოდ დაიჯერა მიშას და „ნაციონალური მოძრაობის“ დაბრუნების საფრთხე, - აცხადებს "დემოკრატიული მოძრაობის" ლიდერი ნინო ბურჯანაძე.

ბურჯანაძის თქმით, სწორედ იმიტომ გადაარჩინა „ქართულმა ოცნებამ“ სააკაშვილი და „ნაციონალური მოძრაობა“ კოჰაბიტაციის გზით, რომ გულუბრყვილო ადამიანებს არჩევანი ჰქონოდათ „ქართულ ოცნებასა“ და „ნაციონალურ მოძრაობას“ შორის და არა „ქართულ ოცნებასა“ და რომელიმე სხვა პოლიტიკურ ძალას შორის.

„ქართულმა ოცნებამ“ მოატყუა მთელი ქართული საზოგადოება და გადაარჩინა „ნაციონალური მოძრაობა“ იმიტომ, რომ ამ არჩევნებში ნებისმიერ ფასად გამარჯვება მოეპოვებინა“, - აცხადებს ბურჯანაძე.

მისივე თქმით, "რამდენიც არ უნდა ისაუბრონ „ქართული ოცნების“ წარმომადგენლებმა იმასთან დაკავშირებით, რომ არჩევნები სამართლიანად ჩატარდა, ამით ფონს ვერ შექმნიან, მით უმეტეს რომ უკვე არსებობს წინასწარი დასკვნები, რომელიც ამ არჩევნებს ეჭვქვეშ აყენებს".

„ჩვენ ხელთ გვაქვს ასობით გაყალბებული და გადაკეთებული ოქმი, რომელიც ვერც ერთ შემთხვევაში ამ არჩევნების ლეგიტიმურობას ვერანაირ პოზიტიურს ვერ შემატებს და ადასტურებს ამ არჩევნებში მანიპულირებასა და გაყალბებას,“ - განაცხადა ნინო ბურჯანაძემ.